betlive მასტერ ლიგა 1 უკვე მეშვიდე სეზონს გადის და აშკარაა, რომ წელს ჩემპიონატმა ახალი ხარისხობრივი დონე შეიძინა. გაუმჯობესდა როგორც მატჩების გადაღების ხარისხი, ასევე თამაშების ორგანიზებულობა, ტაქტიკური სიღრმე და მოთამაშეთა ფიზიკური მზადყოფნა.
გუნდები უკეთ არიან დაკომპლექტებული, თამაშის ტემპი გაიზარდა და მაყურებელი რეალურად გრძნობს, რომ ეს უკვე მხოლოდ სამოყვარულო ტურნირი აღარ არის – ეს პლატფორმაა, სადაც პროფესიონალიზმის სტანდარტები სწრაფად იდგამს ფესვებს.
კავკასიის ავტოიმპორტი 4 ტურის შემდეგ 4 გამარჯვებით აგრძელებს ჩემპიონური გზის გამეორებას. შოთა თოფურიას მიერ წლების განმავლობაში ჩამოყალიბებულ გუნდში კვლავ იგრძნობა გამარჯვების გენეტიკა – მოთამაშეები კარგად იცნობენ ერთმანეთს, ტაქტიკური განლაგება უჩვეულოდ სტაბილურია, ხოლო შეტევაში ბურთის კონტროლი თითქმის ავტომატურ დონეზეა აყვანილი.
აპტოსი 4 თამაშში 4 გამარჯვებით ერთ-ერთ მთავარ ფავორიტად გვევლინება. რაც ყველაზე საინტერესოა, გუნდი მიმდინარე სეზონში წლების განმავლობაში გუნდის არქიტექტორისა და სტრუქტურის ავტორის - ტოგონიძის მიერ აშენებული სისტემის შედეგებს იმკის, რომელსაც ახალი ხელმძღვანელი თოდუა "სადენზე მიბმული ნატრიუმივით" აყოლებს ახალ მუხტებს – ტაქტიკურ სიგრძე-სიგანეს, შეტევით მრავალფეროვნებას და მომენტების რეალიზაციას. მდგომარეობა ძალზე ჰგავს იურგენ კლოპის წასვლის შემდეგ ლივერპულის მიერ კლოპის მემკვიდრეობით ჩემპიონობის გზის გაგრძელებას – როცა ახალი მწვრთნელი არ ანგრევს ძველს, არამედ აკურატულად ავითარებს.
ბრიჯი ასევე 4-დან 4 გამარჯვებით გათამაშების ერთ-ერთი უძლიერესი ძალაა. გუნდს ყველაზე მაღალი შედეგიანობა აქვს – 33 გატანილი ბურთი.
ვაკო ამირანიძის ხელში ბრიჯი იქცა დაუნდობელ მანქანად, რომელიც მწყობრი დაცვით იწყებს შეტევას და ბოლომდე სპობს მოწინააღმდეგეს.
რევაინი დებიუტანტი გუნდია, რომელმაც უკვე 3 მოგება და 1 ფრე დააგროვა. მათი მშიერი, გაბედული სტილი აჩვენებს, რომ რევაინი მხოლოდ მონაწილეობისთვის არ მოსულა უმაღლეს ლიგაში. ეს გუნდი სიურპრიზების მანქანაა, რომელსაც როგორც ჩანს, არც მოწინააღმდეგეების გამოცდილება აშინებს და არც ტრადიციები.
საუკეთესო დაცვა ამ ეტაპისთვის – აპტოსს და კავკასიის ავტოიმპორტს ჰყავს: მხოლოდ 5-5 გაშვებული ბურთი 4 თამაშში. ეს არის ჩემპიონობისთვის აუცილებელი საფუძველი.
ყველაზე სუსტი დაცვით ვაზისუბანი გამოირჩევა: 4 ტურში 30 გაშვებული ბურთი, რაც თითქმის 7 გოლზე მეტია 1 მატჩში.
მე-4 ტური ძალიან საინტერესო გამოდგა:
თბილისის მერიის პირველი სამი ტურის იმედგაცრუება გადაფარა 7:2 გამარჯვებამ ალიზთან. შეიძლება ეს გახდეს მოტივაციის "რესტარტი".
დელისი ჰაბმა ზედიზედ მეორე გამარჯვება იზეიმა, ამჯერად გარეჯთან. პლეი-ოფის ზონისთვის ბრძოლა აქტიურად იწყება და დელისი ჰაბი უკვე ამ პროცესშია.
კრისტალბეთი 3 გამარჯვებით და მხოლოდ 1 მარცხით იმაზე მეტს აჩვენებს, ვიდრე ბევრს ეგონა. გუნდი შეთამაშების პროცესშია, თუმცა უკვე შედეგიანი და სწრაფი ფეხბურთი აჩვენა. კრისტალბეთში დიდი გამოცდილებაა დაგროვებული და ეს გუნდი აუცილებლად წარმოაჩენს საკუთარ თავს სეზონის მანძილზე.
ინტერსპორტისთვის 3 ტურის შემდეგ მარცხი კრისტალბეთთან შესაძლოა სიგნალი იყოს გუნდში გარკვეულ გადაწყობაზე. თუმცა საწყისი ხარისხიანი თამაში რჩება საყრდენად. გუნდი გამოცდილების და ახალგაზრდული ენერგიების შერწყმის პროცესშია და თუ ეს პროცესები კარგად წარიმართა, ისინი კვლავ შეეცდებიან დიდების დარბაზში დაბრუნებას.
ფაქტი ერთია, მეოთხე ტურის შემდეგ გამოკვეთილია რამდენიმე უძლიერესი გუნდი. თუმცა, მათი სტრუქტურა და ძალა იმდენად მრავალფეროვანია, რომ პირდაპირ ბრძოლაში გადასვლას არ უნდა ველოდოთ – ეს იქნება გრძელვადიანი პოზიციური ჭიდილი, რომელშიც მცირე დეტალებიც კი შეიძლება გადამწყვეტი გახდეს. საინტერესოა ვის აღმოაჩნდება ნებისყოფა,ძალა და მენტალური სიმყარე იმისათვის, რომ სეზონი უმაღლეს საფეხბურზე დაასრულოს.