მეორე ლიგა წელს განსაკუთრებით ცოცხალი, მრავალშრიანი და დაძაბულია. გუნდები არა მხოლოდ ქულებისთვის, არამედ საკუთარი იდენტობისთვის იბრძვიან. სამ ტურში უკვე გამოიკვეთა რიგი მოთამაშეების და გუნდების სათამაშო სახე, სხვები კი ჯერ კიდევ ძიებაში არიან. სამი ტურის თავზე მოკლედ გაგაცნობთ თითოეული გუნდის მდგომარეობას:
ონვეი – ეს გუნდი ისეთივე ორგანიზებულია, როგორც მათი ლოგისტიკური სისტემა – არაფერი არ ქრება და ყველაფერი მიდის სწორი მიმართულებით. შეიძლება თამაშს არ ანვითარებენ ელვის სისწრაფით, მაგრამ წერტილოვანი შეტევები – როგორც ამანათი – აუცილებლად მიდის მიზნამდე. მათ საწყის სამ ტურში ქულების მაქსიმალური რაოდენობა დააგროვეს და ერთადერთია მე-2 ლიგაში ვინც ეს მოახერხა.
მარტყოფი (ყოფილი მუხბე) – გუნდი ახალი სახელით, ძველი ხასიათით. შარშან ცოტა დააკლდათ უმაღლესში აღზევებისთვის და წელს მაქსიმალური კონცენტრაციით ეცდებიან მიზნის რეალიზებას. ჯერ ისევ წაუგებელია და ეტყობა, რომ ეს სეზონი მათთვის არ არის უბრალოდ მორიგი მცდელობა – ეს არის დაბრუნება დაუმთავრებელი საქმის დასასრულებლად, მარტყოფი დაიქოქა და ჩემპიონობისთვის იბრძოლებს.
სპარტა – ხუთი წელი ლიგაში ყოფნის მერე, მათ ჩამოუყალიბდათ სტაბილური იდენტობა. გუნდი ფეხბურთის სიყვარულზე დგას და მათი თითოეული წევრი საკუთარი რიტმით, მაგრამ ერთიანი სულით იბრძვის. სპარტა წელს პრაგმატული და მიზანდასახული ფეხბურთით საჩემპიონო შვიდეულისთვის იბრძოლებს.
ბეთლაივი 2025 წელს იქცა ტრანსფორმაციის ეტალონად. გუნდში ახალი ფიგურები გაერთიანდნენ, როგორიცაა ლევან ბოტკოველი, დავით გაგნიძე, გიგა ჭანკვეტაძე და გიგა ყურშიტაშვილი — და ამ სახელებმა არა უბრალოდ შემადგენლობა შეცვალა, არამედ გუნდის „დნმ“ ხელახლა დაწერა.
ჯიშკარიანისა და ტოგონიძის ტანდემი გუნდს აშენებენ როგორც არქიტექტორები – სტრუქტურული ხედვით და სიღრმით. თუ ვინმეს ეჭვი ეპარება მათი ხედვის ეფექტურობაში, აპტოსის შედეგებს შეხედოს. ახლა ბეთლაივი აღარ არის მხოლოდ ფორმალური მონაწილე – ის არის ერთ-ერთი ყველაზე სერიოზული საფეხბურთო ორგანიზაცია მეორე ლიგაში.
ჩივასი - თამაშში სიჩქარე აკლია, მაგრამ კლასი ყველაფერს ფარავს – გუნდის ბირთვი გამოცდილი მოთამაშეებითაა დაკომპლექტებული. შესაძლოა, ეს გახლავთ გუნდი, რომელიც შეიძლება ნელა მიდიოდეს, მაგრამ იქ მიდის, სადაც ჩემპიონები იკრიბებიან. გამოცდილებით, თამაშის წაკითხვის უნარით და ჩაშენებული სისტემური დისციპლინით ისინი ამ ლიგის ჩემპიონობის პრეტენდენტებად რჩებიან.
სეტანტა - გუნდი დაკომპლექტებულია ისეთი ფეხბურთელებით, ვისაც ბურთი უგორებია პროფესიონალურ და სამოყვარულო არენაზეც — და რაც მთავარია, მათ ეს ხარისხიანად უკეთებიათ.
სეტანტა არ გარბის თავქუდმოგლეჯილი, აკონტროლებს სიჩქარეს, ისე იქცევა როგორც ვეტერანი პიანისტი, რომელიც არ ეჯიბრება სხვებს ნოტების რაოდენობაში, არამედ ერთ სწორ აკორდში დებს ყველაფერს. ტემპის მართვა, პოზიციური სისუფთავე და გამოცდილებაზე დაფუძნებული მოძრაობა – ეს სეტანტას თამაშის ხელწერაა. ისინი უმაღლესი მიზნებისთვის იბრძოლებენ.
სფერა – ემოციურად დატვირთული, შემტევი გუნდი. ნიჭის ფეთქებადობამ შესაძლოა გააოცოს ლიგა, მაგრამ დისციპლინის დეფიციტი მათი მთავარი მოწინააღმდეგეა, რომელსაც უკვე მე-5 წელია ვერ ამარცხებენ . გუნდს უნარიც აქვს და პოტენციალიც, მაგრამ ცოტნე ქინქლაძის წასვლის შემდეგ არ ჩანს ფიგურა, ვინც გუნდის თამაშს მართავს და ლიდერი გახდება. წესრიგი თუ მოიმატებს – შედეგიც გამოჩნდება.
კაიზენი – მესამე ლიგის მეფე, რომელმაც საცხოვრებელი ადგილი შეიცვალა და მეორე ლიგის ჯუნგლებში ცდილობს თავის დამკვიდრებას. შედეგი? ჯერჯერობით არასახარბიელოა. მაგრამ ეს გუნდი ერთიანობაზეა აშენებული, და როცა მათი სისტემური განვითარება ტექნიკურ პროგრესს დაემთხვევა, საჩემპიონო შვიდეულშიც იბრძოლებენ ადგილისთვის. ყველაფერი მათზეა დამოკიდებული და თუ საწყისი შოკი დროულად დაძლიეს, ყველაფერი შესაძლებელია.
ადვოკატთა ასოციაცია – თენგიზ სულაქველიძის ხელმძღვანელობით გუნდი ფიზიკურად და ტაქტიკურად კარგად მომზადებული ჩანს. მათი თამაში ზუსტად ისეთია, როგორიც დახვეწილი იურიდიული სტრატეგია – გააზრებული, უკონფლიქტო და მტკიცედ დასაბუთებული. მოედანზე თამაშობენ ისე, როგორც პროცესზე – ფაქტებით, დასაბუთებული არგუმენტებით და არა ემოციებით.
ბენე – ბენე ამ სეზონში ოფიციალურად დებიუტანტია, მაგრამ შესვლის სტილი იმდენად მტკიცეა, რომ სამატჩო შედეგებიდანაც ჩანს – ეს გუნდი აქ შემთხვევით არ მოხვედრილა. სამ ტურში მოპოვებული 6 ქულა არის არა უბრალოდ სტარტი, არამედ მესიჯი კონკურენტებისთვის: "დაგვიმახსოვრეთ, ეს მხოლოდ დასაწყისია."
ბენე თამაშობს როგორც გუნდი, რომელმაც იცის სად მიდის – არ აფორიაქებს მარცხი და არ ახასიათებს ეიფორია მოგებაზე. ეს გუნდური მენტალობაა, რომელიც დებიუტისთვის უჩვეულოდ დახვეწილია და გამომუშავებულია. გუნდი მიმდინარე წელსაც შეეცდება მაღალ ლიგაში აღზევებას, რისი რესურსიც რეალურად გააჩნიათ.
ეფა ჰიქ – თუ წინა სეზონში მათი სახელი მხოლოდ ფორმალურად ისმოდა, ახლა ყველამ იცის, რომ ეს გუნდი უკვე თვითონ ქმნის საკუთარ სახელს. ეფა ჰიქმა დაამტკიცა, რომ სახელი ქმედებებით უნდა დაიმსახურო და მათ ეს მოახერხეს. სეზონის სტარტიდანვე იგრძნობა მოტივაცია, სიღრმე და ტემპი. გუნდი თავდაჯერებულად თამაშობს და თუ მუხტი შეინარჩუნეს, პლე-იოფის ზონაში ადგილი სრულიად რეალურია.
თეგეტა - მიმდინარე სეზონში მოედანზე ისეთივე პრესტიჟულად არ ჟღერს, როგორც ავტოინდუსტრიაში. საწყისი ტურიდანვე ჩეკ ენჯინი ყვითლად ციმციმებს და თუ დროული დიაგნოსტიკა და ტექნიკური სამუშაოები არ ჩაუტარდა გუნდს, ყვითელი მაჩვენებელი გაწითლდება ან მათი საჭე მესამე ლიგის მიმართულებით ნაადრევად გადაუხვევს.
აგრუნი/ფრიუნი - სტუდენტური გუნდია და თამაშშიც ჩანს ეს. მათში არის ახალგაზრდული ენთუზიაზმი, ენერგია და ზოგჯერ ზედმეტი გაბედულობაც, როგორც ზეპირ პასუხში, როცა საგანი ჯერ არ გაგიხსნია. საწყისი ტურების შემდეგ შთაბეჭდილება რჩება, რომ ფრიუნი ჯერ სადისკუსიო სემინარზეა, თან გამოცდის ბილეთიც წინ უდევს.
გუნდს ეტყობა ჭკუა, მაგრამ თამაშის „კურიკულუმი“ ჯერ ბოლომდე არ აქვთ ათვისებული. მათთვის ეს სეზონი პრაქტიკაზე გასვლის ტოლფასია – სად აიმაღლებენ შეფასებას და სად „დაეწერებათ“ საპლეიოფო ქულა, სეზონის ბოლოს გამოჩნდება. მანმდე კი გუნდმა წარუმატებლობაში საკუთარი შეცდომების დანახვა უნდა ისწავლოს და შედეგიც აუცილებლად პროცესში მოვა.
არქი სეზონს ისე იწყებს, თითქოს შენობას აშენებს – მაგრამ ჯერ სართულები ვერ ააწყო. გუნდის შემადგენლობა ტექნიკურია, მოძრაობა ზუსტი, მაგრამ დამთავრებას ყოველთვის რაღაც "ფანჯარა აკლია".
შეტევები თითქოს ფურცელზე უკეთესია, ვიდრე რეალურად. გუნდი ახლა იმ ფაზაშია, როცა პროექტის ესკიზი უკვე წარდგენილია და მშენებლობა ვერ შედგა. მაგრამ საკმარისია საფუძველი სწორად დააფიქსირონ და ზემოთ აუცილებლად ავა. არქი ის გუნდია, რომელსაც სეზონის მეორე ნახევარში შეუძლია ერთბაშად აუშენოს თავზე ქულების გუმბათი მეტოქეებს, თუმცა ვნახოთ რა მოხდება.
სპ. საგამოძიებო - გამოცდილი გუნდია, თუმცა საწყის 3 ტურში ორი მარცხი დაფიქრების საფუძველია. გუნდს თითქოს გამოძიების პროცესში შიგნით გაჩენილი კითხვები აქვს საკუთარ თამაშზეც – სად წყდება კონცენტრაცია? ვინ გადის პოზიციიდან? და რატომ არ მუშაობს საგანგებო გეგმა? მათი თამაში ჩიხშია შესული და აუცილებელია არსებული მტკიცებულებების ხელახალი ანალიზი.
თბილსერვისი ჯერ ვერ თამაშობს ისე ორგანიზებულად და გაწერილად, როგორც თბილისის ქუჩებში და სკვერებში მათი ტექნიკა და გუნდი მოძრაობს. მაგრამ ამ გუნდში იგრძნობა იმედი რომ დრო მოვა და ისინი უბრალოდ მწყობრი სისტემით მიადგებიან შედეგს. ახლა ჯერ გზა იგეგმება და შედეგი შემდეგ ტურებში გამოჩნდება.
სდსს-მ სეზონი გამარჯვებით დაიწყო, თუმცა, შემდეგ ორი მარცხი განიცადა. გუნდი ჯერ კიდევ ეძებს ოპტიმალურ სათამაშო სტილსა და სტრატეგიას, მაგრამ გამოცდილება და ისტორია მათ მხარესაა.
ეს გუნდი ორგზის betlive Master League-ის ჩემპიონია და ახლაც სწორედ იმ გზას ადგას, რომელიც უპირველესად უმაღლეს ლიგაში დაბრუნებას, შემდეგ კი დიდების აღდგენას უნდა ეცადოს. როცა კარიერული ქამბექის დრო მოდის, გამოცდილ გუნდებს ყოველთვის განსაკუთრებული სიტყვა აქვთ სათქმელი და სდსს შეეცდება, რომ სათქმელის ჩამოყალიბებას უკვე შემდეგი ტურიდან შეუდგეს.
betlive Master League 2-ის სტარტმა მკაფიოდ აჩვენა, რომ ეს სეზონი არც მოსაწყენი იქნება და არც წინასწარ პროგნოზირებადი.
დებიუტანტები ეუფლებიან სივრცეს, ხოლო ძველი გვარდია კლასის ხარჯზე ცდილობს ქულების მოგროვებას.
შემდეგ ტურებში ტემპი კიდევ უფრო გაიზრდება, ცხრილში კი დაბნეულობის ნაცვლად ბრძოლა გაჩნდება და სწორედ მაშინ გამოჩნდება, ვინ არის მოსული მართლა მხოლოდ მონაწილეობისთვის და ვინ – ჩემპიონობისთვის.
ყველაფერი ჯერ მხოლოდ იწყება და თამაშის სცენარი ჯერ კიდევ ბევრ გუნდს არ დაუწერია.