თბილისის betlive მასტერ ლიგა 3-ის „ა“ ჯგუფში, ოთხი ტურის შემდეგ ჯი ვი პი სატურნირო ცხრილის სათავეშია და წყალმომარაგების კომპანიის ბიჭები ისევე თავისუფლად გადაადგილდებიან მოედანზე, როგორც მაგისტრალურ მილებში წყალი. მათი ქსელი არ არის გაჭედილი, არც ხმაურობს. მხოლოდ წნევით მოძრაობს და აბონენტამდე ყოველთვის დროულად მიდის. მოთამაშეები შედეგიანები არიან, რადგან იციან, რომ დრო და სივრცე ისეთივე ძვირფასია, როგორც წყალი მშრალ ზაფხულში.
გუნდში და “ა” ჯგუფის ფარგლებში გამორჩეულად ირჯებიან ბექა ბუიღლიშვილი და დავით ტყეშელაშვილი. თითოეულს 6 გოლი აქვს გატანილი და უბრალო დინებას დამანგრეველ ტალღებად აქცევენ. გიორგი გორგაძე კი მოედნის ხედვის კურსის პრაქტიკული გურუა.
ევექსი პულსზე მოთამაშე გუნდია. როგორც საავადმყოფოთა ქსელის წარმომადგენლები, ევექსის გუნდი გულმოდგინებას, სტაბილურობას და კრიტიკულ სიტუაციაში მშვიდად გადაწყვეტილების მიღებას არის ნაჩვევი და ეს მათ საწყის თამაშებზეც აისახება. მათ თამაშში თითქოს სიცოცხლის რიტმია ჩადებული. შეტევაში გულით, დაცვაში კი გონებით თამაშობენ. იციან, რომელ მომენტში უნდა „დაუწიონ წნევა“ მოწინააღმდეგეს და როდის უნდა გამოიწერონ გოლი სამკურნალოდ.
ფესვები გუნდია, რომელმაც იდენტობა მოიტანა და მოედანზე დარგო. ფესვები ფერეიდანში დაბადებული და საქართველოში დაბრუნებული ქართველების მიერ შექმნილი გუნდია და ეს იგრძნობა მათი შინდისფერი მენტალიტეტით გაჯერებულ თამაშში.
ეს გუნდი არ თამაშობს უბრალოდ ბურთზე. ისინი თამაშობენ თავიანთი ისტორიის გამოსახატად. თითოეული გოლი რაღაც ძველის დაბრუნებას ჰგავს, თითქოს მემკვიდრეობით მოიტანეს და ახლა მოედანზე ააყვავეს.
დიპლომატ ჯორჯია პასის კულტურით შექმნილი სტრუქტურაა. როგორც სადისტრიბუციო კომპანია, დიპლომატ ჯორჯიამ ზუსტად იცის, როგორ უნდა გადაანაწილოს რესურსი ან ბურთი. მათი თამაში ლოჯისტიკურად გამართულია: სივრცის გამოყენება, გადაცემის სიზუსტე და დაგეგმილი შეტევა. დისტრიბუცია აქვთ არა მხოლოდ მაღაზიამდე, არამედ მეტოქე გუნდის კარამდეც. გუნდის უდავო ლიდერი გუგა კამლაძეა. გუგა გამოცდილი და დიდი კლასის მატარებელია. იგი ბურთს განსხვავებულად ეურთიერთება.
ტტც - თბილისის სატრანსპორტო კომპანიის გუნდი სიურპრიზებით და მოულოდნელობებით აღსავსეა. თამაშიც იმ თბილისში არსებული მოძრაობის სტილში აქვთ. ხან თავისი განრიგით ლაინებს მიუყვებიან და ზოგჯერ თითქოს შუაგულ პიკის საათზე არიან. ტტც გამოცდილი გუნდია და ისინი საკუთარი დიდების დაბრუნებას შეეცდებიან.
ჩემპიონატს ორი გამოკვეთილი აუტსაიდერი ჰყავს:
ჰიუნდაი, რომლის ძრავაც ჯერ არ ხურდება და გავს ავტომობილს, რომლის გადაცემაში ჯერ მარტო პირველია და დრო სჭირდებათ, რომ სხვა სიჩქარეში გადავიდნენ.
გეიმ ჩეინჯერი ჯერ არც თამაშს ცვლის, არც სცენარს, თუმცა სახელი აქვთ, რომელიც ცვლილებას გვპირდება მაგრამ ჯერ ცვლილება საკუთარ თავზე უნდა დაიწყონ. ისეთი შთაბეჭდილება რჩება, რომ თამაშის კონტროლს სხვა კონსოლზე ეძებენ. იმედია, შემდგომ ტურებში მართლა "ჩეინჯერები" გახდებიან.