7x7 ფეხბურთის ასოციაციის ორგანიზებული ჩემპიონატების 2024 წლის სეზონის სატრანსფერო დებულება

მუხლი 1. ტერმინთა განმარტება

1. შფა - ააიპ 7x7 ფეხბურთის ასოციაცია

2. სფფ - საქართველოს ფეხბურთის ფედერაცია;

3. FIFA- საფეხბურთო ასოციაციათა საერთაშორისო ფედერაცია;

4. UEFA - ევროპის საფეხბურთო ასოციაციათა კავშირი;

5. მასტერ ლიგის სამოყვარულო საფეხბურთო გუნდი - გუნდი, რომელიც მონაწილეობს 7x7 ფეხბურთის ასოციაციის მიერ ორგანიზებულ ტურნირებში, რეგისტრირებულია შფა-ს გუნდების რეესტრში და არ არის რეგისტრირებული იურიდიულ პირად.

6. მასტერ ლიგის სამოყვარულო საფეხბურთო კლუბი - სამოყვარულო საფეხბურთო გუნდი, რომელიც რეგისტრირებულია იურიდიულ პირად;

7. პროფესიონალური საფეხბურთო კლუბი -FIFA-სა და UEFA-ს შემადგენლობაში შემავალი ეროვნული საფეხბურთო ასოციაციების მიერ აღიარებული საფეხბურთო გუნდები.

8. პროფესიონალი ფეხბურთელი - რომელიც betlive Master League“ -ის, „betlive Master League 2“-ის, „betlive Master League 3“-ის და რეგიონალურ თუ მუნიციპალური ჩემპიონატების მონაწილე გუნდების რეგისტრაციის დასრულებისას ირიცხება საქართველოს ეროვნული - 1, ეროვნული - 2, რანგით მე-3 ლიგაში, რანგით მე-4 ლიგაში, რანგით მე-5 ლიგაში, ჭაბუკთა ლიგაში მოასპარეზე გუნდში ან მონაწილეობას იღებს რომელიმე ასაკობრივ ჩემპიონატში, ასევე ფუტსალის უმაღლეს ლიგაში, ფუტსალის მეორე და მესამე ლიგაში მოასპარეზე გუნდში .

9. მოყვარული ფეხბურთელი - ფეხბურთელი, რომელიც ირიცხება შფა-ს ტურნირებში მონაწილე გუნდის შემადგენლობაში და ამავდროულად, ტურნირის რეგისტრაციის დასრულებისას არ ირიცხება საქართველოს ეროვნული ლიგა - 1, ეროვნული ლიგა - 2, რანგით მე-3, რანგით მე-4, რანგით მე-5 და ჭაბუკთა ლიგების რომელიმე გუნდში;

10. ახალი მოყვარული ფეხბურთელი - ფეხბურთელი, რომელიც შფა-ს მიერ ორგანიზებული ოფიციალური ტურნირის მიმდინარეობისას არ ირიცხებოდა არცერთ სამოყვარულო საფეხბურთო გუნდში და სატრანსფერო პერიოდში ან/და მანამდე წინამდებარე დებულების დაცვით რეგისტრირდება მოყვარულ ფეხბურთელად;

11. თავისუფალი ფეხბურთელი - ფეხბურთელი, რომელიც შფა-ს მიერ ორგანიზებული ოფიციალური ტურნირის მიმდინარეობისას ირიცხებოდა პროფესიონალურ საფეხბურთო კლუბში ან სამოყვარულო საფეხბურთო გუნდში და სატრანსფერო პერიოდის დაწყებამდე ან მისი მიმდინარეობისას აღარ ირიცხება აღნიშნულ გუნდში.

12. ყოფილი გუნდი - გუნდი, რომელსაც ტოვებს მოყვარული ფეხბურთელი;

13. ახალი გუნდი - გუნდი, რომელსაც მოყვარული ფეხბურთელი უერთდება;

14. სატრანსფერო მოსაკრებელი - შფა-ს მიერ დადგენილი თანხა, რომლის გადახდაც ხორციელდება თავისუფალ სატრანსფერო პერიოდის მიღმა განხორციელებულ ტრანსფერებზე.

15. თავისუფალი სატრანსფერო პერიოდი - შფა-ს მიერ დადგენილი დროის მონაკვეთი, როდესაც დაშვებულია გუნდების შემადგენლობის განახლება უსასყიდლოდ, სატრაფსფერო მოსაკრებლის გარეშე.

16. ტრანსფერი - მოყვარული ფეხბურთელის გადასვლა ერთი სამოყვარულო საფეხბურთო გუნდიდან მეორეში ან/და ახალი მოყვარული ფეხბურთელის რეგისტრაცია სამოყვარულო საფეხბურთო გუნდში;

17. სეზონი - დროის პერიოდი, რომელიც იწყება პირველი ოფიციალური მატჩით და მთავრდება ბოლო ოფიციალური მატჩით.

მუხლი 2. მოქმედების სფერო

1. ეს დებულება არეგულირებს შფა-ს მიერ ორგანიზებულ ტურნირებში მოყვარული ფეხბურთელების ტრანსფერებისა და რეგისტრაციის წესებს.

2. შფა აღიარებს FIFA-ს, UEFA-ს და სფფ-ის იურისდიქციას, სამართლებრივ რეგულაციებს, მათ შორის სატრანსფერო რეგულაციებთან დაკავშირებულ ნორმებს. ის საკითხები, რომლებსაც არ არეგულირებს ეს დებულება განიხილება FIFA-ს, UEFA-ს და სფფ-ის შესაბამისი რეგულაციით.

მუხლი 3. თავისუფალი სატრანსფერო პერიოდი და განაცხადის რეგისტრაციისა და ჩემპიონატის მსვლელობისას ახალი ან/და თავისუფალი ფეხბურთელის დამატების წესი.

1. 2024 წლის სეზონის betlive Master League“ -ის, „betlive Master League 2“-ის, „betlive Master League 3“-ის რეგიონალური და მუნიციპალური ჩემპიონატების თავისუფალი სატრანსფერო პერიოდი იწყება 2024 წლის 05 აგვისტოს და მთავრდება 2024 წლის 31 აგვისტოს რა დროსაც გუნდებს ეძლევათ შესაძლებლობა უსასყიდლოდ განაახლონ შემადგენლობა არაუმეტეს 10 მოთამაშის ოდენობით.

2. თბილისის betlive Master League“ -ის, „betlive Master League 2“-ის, „betlive Master League 3“- ის და რეგიონალურ თუ მუნიციპალურ ჩემპიონატებში მონაწილე გუნდის განაცხადში უნდა იყოს არანაკლებ 14 და არაუმეტეს 20 მოთამაშე, მათ შორის 2 მეკარე აუცილებლად.

3. მონაწილე გუნდებს თავისუფალი სატრანსფერო პერიოდის მიღმა შესაძლებლობა აქვთ ნებისმიერ დროს განახორციელონ თავისუფალი ან/და ახალი ფეხბურთელის დამატება არაუმეტეს 4 ჯერ თავისუფალი სატრანსფერო პერიოდის დაწყებამდე და არაუმეტეს 4 ჯერ თავისუფალი სატრანსფერო პერიოდის დასრულების შემდგომ - ჩემპიონატის დაწყების შემდეგ ფეხბურთელის დამატებისათვის განკუთვნილი მოსაკრებელი შეადგენს 200 ლარს თითოეულ დამატებულ ფეხბურთელზე.

4. თავისუფალი ფეხბურთელის დამატების დროს გუნდმა უნდა წარმოადგინოს განთავისუფლების ცნობა და განაცხადი ფეხბურთელის დამატების თაობაზე, მოსაკრებლის გადახდის ქვითარი.

5. თუ თავისუფალი სატრანსფერო პერიოდის მიღმა ხდება ფეხბურთელის ერთი გუნდიდან მეორე გუნდში გადასვლა, ასეთ დროს გუნდი რომელიც თმობს ფეხბურთელს უფლება აქვს მოითხოვოს საკომპენსაციო თანხა არაუმეტეს 1000 ლარის ოდენობით.

მუხლი 4. ყოფილი პროფესიონალი ფეხბურთელის გუნდის განაცხადში რეგისტრაციის წესი

1. ყოფილ პროფესიონალ ფეხბურთელად ითვლება ფეხბურთელი, რომელიც betlive Master League-ის 2024 წლის სეზონისათვის რეგისტრაციის დაწყების დროს ირიცხებოდა საქართველოს ეროვნული - 1, ეროვნული - 2, რანგით მე-3 ლიგაში, რანგით მე-4 ლიგაში, რანგით მე-5 ლიგაში, ჭაბუკთა ლიგაში ან რომელიმე ასაკობრივ ჩემპიონატში მოასპარეზე გუნდში, ასევე ფუტსალის 1, მე-2 ან მე-3 ლიგაში მოასპარეზე გუნდში.

2. ფუტსალის რომელიმე ლიგაში მოთამაშე ყოფილი პროფესიონალი ფეხბურთელი, რომელიც განთავისუფლებულია გუნდიდან 2024 წლის 1 იანვრის შემდეგ, შესაძლებელია დარეგისტრირდეს გუნდის განაცხადში, მხოლოდ 2025 წლის სეზონში. (გარდა იმ შემთხვევისა თუ ფეხბურთელს არცერთ ოფიციალურ თამაშში არ აქვს მონაწილეობა მიღებული და დარჩენილი იყო გუნდის განაცხადში)

3. საქართველოს ეროვნული - 1, ეროვნული - 2, რანგით მე-3 ლიგაში, რანგით მე-4 ლიგაში, რანგით მე-5 ლიგაში, ჭაბუკთა ლიგაში ან რომელიმე ასაკობრივ ჩემპიონატში მოასპარეზე ყოფილი პროფესიონალი ფეხბურთელის გუნდის განაცხადში შეიძლება დარეგისტრირდეს თუ მისი ოფიციალურად განთავისუფლებიდან გასულია 3 თვე.

მუხლი 5. შეტყობინების ვალდებულება

1. ტრანსფერის განხორციელების შემთხვევაში ახალმა გუნდმა შფა-ს უნდა წარუდგინოს განცხადება ფეხბურთელის განაცხადში რეგისტრაციის შესახებ.

2. ტრანსფერის განხორციელების შემთხვევაში ძველი გუნდის წარმომადგენელი ვალდებულია დაუკავშირდეს შფა-ს და მოითხოვოს ფეხბურთელის გუნდის განაცხადიდან ამორიცხვა.

3. თავისუფალ სატრანსფერო პერიოდში ახალი მოყვარული ფეხბურთელის დამატების შემთხვევაში გუნდმა შფა-ს უნდა წარუდგინოს განცხადება ფეხბურთელების დამატების შესახებ.

მუხლი 6. კონფიდენციალობა

პერსონალური მონაცემები, რომელსაც ასოციაცია იღებს განაცხადის რეგისტრაციისა თუ ტრანსფერის დროს კონფიდენციალურია და დაუშვებელია მათი გადაცემა მესამე პირებზე თუ არ არსებობს შესაბამისი თანხმობა.

მუხლი 7. დისციპლინარული სასჯელი

სატრანსფერო რეგულაციების დარღვევისათვის

სატრანსფერო დებულების მოთხოვნების დარღვევის შემთხვევაში დამრღვევ გუნდს დაეკისრება სანქცია, რომელსაც განსაზღვრავს შფა-ს სადისციპლინო კომიტეტი სადისციპლინო კოდექსის შესაბამისად.

მუხლი 8. დებულების ძალაში შესვლა

1. სატრანსფერო დებულება ძალაში შედის 2024 წლის 1 იანვრიდან და მოქმედებს 2024 წლის 20 დეკემბრამდე.

2. სატრანსფერო დებულებაში ცვლილებების შეტანა დასაშვებია, მხოლოდ განსაკუთრებულ შემთხვევებში, არგუმენტირებული დასაბუთების საფუძველზე, ააიპ 7x7 ფეხბურთის ასოციაციის გამგეობის მიერ, შესაბამისი ცვლილების ოქმის დამტკიცებით.

ააიპ 7x7 ფეხბურთის ასოციაციის გამგეობა