თავი I. შესავალი,

კოდექსის რეგულირების სფერო და საქმიანობა

მუხლი 1.მიზანი

ეს კოდექსი მოიცავს საქართველოს 7x7 ფეხბურთის ასოციაციის (შემდგომში “შფა-ს”) მიერ ორგანიზებული სამოყვარულო საფეხბურთო ჩემპიონატების დებულებებისა და ხელშეკრულებით ნაკისრი ვალდებულებების შეუსრულებლობით გამოწვეული შესაძლო დარღვევების ჩამონათვალს, განსაზღვრავს სანქციებს, არეგულირებს გადაწყვეტილების მიმღები ორგანოების ფუნქციონირებას, ამ ორგანოების მიერ გასატარებელ პროცედურებს და ასევე, მათ მიერ მიღებული გადაწყვეტილებების აღსრულების წესს და საფუძვლებს.

მუხლი 2. მოქმედების სფერო

წინამდებარე კოდექსის მოქმედება ვრცელდება შფა-ს მიერ ორგანიზებული სამოყვარულო საფეხბურთო ჩემპიონატების მონაწილე:

ა. გუნდებსა და კლუბებზე;

ბ. მწრთვნელებზე და გუნდის/კლუბის ოფიციალურ წარმომადგენლებზე; გ. ფეხბურთელებზე;

დ. გულშემატკივრებზე; ე. მსაჯებზე;

ვ. მატჩის დელეგატებზე.

ზ. მატჩის ოფიციალურ პირებზე, რომელიც დანიშნულია შფა-ს მიერ.

მუხლი 3. მოქმედების დრო

წინამდებარე კოდექსი გამოიყენება იმ ფაქტებზე, რომელიც წარმოიშვა მისი ძალაში შესვლის შემდეგ.

მუხლი 4. განსაზღვრებები

1. შფა - საქართველოს 7x7 ფეხბურთის ასოციაცია

2. FIFA - საფეხბურთო ასოციაციათა საერთაშორისო ფედერაცია.

3. UEFA - ევროპის საფეხბურთო ასოციაციათა კავშირი.

4. სფფ - საქართველოს ფეხბურთის ფედერაცია.

5. გადაწყვეტილების მიმღები ორგანოები - შფა–ს სადისციპლინო კომიტეტი

6. ჩემპიონატი - შფა-ს მიერ ორგანიზებული ლიგის ან/და თასის სისტემით გამართული სამოყვარულო საფეხბურთო ტურნირი.

7. მატჩი - შფა-ს მიერ ორგანიზებული ჩემპიონატის საფეხბურთო შეჯიბრი ორ სამოყვარულო საფეხბურთო გუნდს შორის.

8. გუნდი - საფეხბურთო გუნდი, რომელიც მონაწილეობს საქართველოს 7x7 ფეხბურთის ასოციაციის მიერ ორგანიზებულ ოფიციალურ ტურნირებში, რეგისტრირებულია შფა-ს გუნდების რეესტრში და არის რეგისტრირებული იურიდიულ პირად.

9. კლუბი - სამოყვარულო საფეხბურთო გუნდი, რომელიც რეგისტრირებულია იურიდიულ პირად.

10. მატჩის წინ - დრო სტადიონის ტერიტორიაზე გუნდების მისვლიდან და მსაჯის მიერ მატჩის დაწყების აღმნიშვნელ სასტვენამდე.

11. მატჩის მიმდინარეობა - დრო მატჩის დაწყებამდე და მის დამთავრებამდე (გამოიხატება მსაჯის სასტარტო და ფინალური სასტვენით);

12. მატჩის შემდეგ - მსაჯის მიერ მატჩის დასრულების აღმნიშვნელ ფინალურ სასტვენსა და სტადიონის ტერიტორიიდან გუნდების გასვლას შორის დრო;

13. ოფიციალური წარმომადგენელი - პირი, რომელიც ახორციელებს შფა-ს მიერ ორგანიზებულ სამოყვარულო საფეხბურთო ჩემპიონატის მონაწილე გუნდის წარმომადგენლობას, რომელიც ასეთად არის მითითებული გუნდის სარეგისტრაციო განაცხადში.

14. პროფესიონალი ფეხბურთელი - ფეხბურთელი, რომელიც შფა-ს ტურნირებში მონაწილე გუნდების რეგისტრაციის დასრულებისას ირიცხება საქართველოს ეროვნული - 1, ეროვნული -2, რანგით მე-3 ლიგაში, რანგით მე-4, რანგით მე-5 და ფუტზალის უმაღლეს, მეორე და მესამე ლიგაში მოასპარეზე გუნდში (ფუტსალის მოთამაშეებზე მხედველობაში მიიღება დებულებით გათვალისწინებული საგამონაკლისო შემთხვევა - დებულებაში ასეთი დათქმის არსებობის შემთხვევაში).

15. მსაჯი - შფა-ს და სფფ-ს მიერ დანიშნული ოფიციალური პირი, რომელიც განსაზღვრავს საფეხბურთო მატჩის მიმდინარეობას მოედანზე IFAB-ის თამაშის წესების შესაბამისად.

16. მატჩის დელეგატი - შფა-ს წარმომადგენელი შფა-ს მიერ ორგანიზებული სამოყვარულო საფეხბურთო ჩემპიონატის მატჩის მსვლელობისას.

17. მატჩის ოფიციალური პირი - არბიტრი, არბიტრის ასისტენტები, მატჩის დელეგატი, კოორდინატორი, უსაფრთხოებაზე პასუხისმგებელი პირი და შფა-ს მიერ დანიშნული ნებისმიერი სხვა პირი, რომელმაც უნდა შეასრულოს მატჩთან დაკავშირებული ვალდებულებები.

18. გულშემატკივარი - პირი რომელიც სტადიონზეა მატჩამდე, მატჩისას და მატჩის შემდეგ და არ მიეკუთვნება ოფიციალურ პირებს, ფეხბურთელებს და სტადიონის მომსახურე პერსონალს.

19. თამაშის წესები - ფეხბურთის თამაშის წესები, მიღებული FIFA-ს, UEFA-ს, სფფ-ს და შფა-ს წესდებისა და დებულებების შესაბამისად.

20. გარიგებული მატჩი - საფეხბურთო მატჩი, რომელიც ტარდება შფა-ს ეგიდით, რომელშიც დადგენილია მატჩის შედეგის გამიზნული მანიპულაცია, მატერიალური და სხვა სარგებლის მიღების მიზნით.

მუხლი 5. რიცხვი

პირობები, რომლებიც მოცემულია მხოლობით რიცხვში მიესადაგება მრავლობითსაც და პირიქით.

თავი II . პირობები სანქციებისათვის

მუხლი 6. დისციპლინური დარღვევა

დისციპლინურ დარღვევად ითვლება პირის ქმედება, რომელიც არღვევს შფა-ს დებულებებითა და დისციპლინური კოდექსით განსაზღვრულ წესებს.

მუხლი 7. დამრღვევი

დისციპლინარული დარღვევის განხორციელებაში „დამრღვევად“ ითვლება პირი მიუხედავად იმისა, განზრახ ჩაიდინა დარღვევა თუ გაუფრთხილებლობით.

მუხლი 8. თანამონაწილეობა

1. დისციპლინური დარღვევის ჩადენაში ორი ან მეტი პირის მონაწილეობა ითვლება თანამონაწილეობად და ისჯება ამ კოდექსის შესაბამისად.

2. პირი, რომელიც განზრახ იღებს მონაწილეობას სადისციპლინო დარღვევის ჩადენაში, როგორც წამქეზებელი ან დარღვევის თანამონაწილე, ასევე, ისჯება ამ კოდექსით დადგენილი წესით. დაუშვებელია თანამონაწილეობა სრულად გათავისუფლდეს პასუხისმგებლობისაგან.

3. გადაწყვეტილების მიღებისას, სადისციპლინო ორგანო აფასებს სავარაუდო დამრღვევი პირის ბრალეულობის ხარისხს და საჭიროებისამებრ, შეუძლია შეამციროს სანქციის მოცულობა. ამასთანავე, დაუშვებელია დამრღვევ პირს დაეკისროს იმაზე ნაკლები ოდენობის ფინანსური სანქცია, ვიდრე ეს განსაზღვრულია ამ კოდექსით.

მუხლი 8. დარღვევის მცდელობა

დარღვევის მცდელობად ითვლება პირის გამიზნული მოქმედება, რომელიც უშუალოდ მიმართულია ამ კოდექსით გათვალისწინებული დანაშაულის/დარღვევის ჩასადენად, მაგრამ მისი ბოლომდე მიყვანა ვერ მოხერხდა.

9. სპორტული სანქციების მნიშვნელობა

1. სპორტულ სანქციად ითვლება იურიდიული ორგანოს მიერ დადგენილი დისციპლინარული დარღვევისათვის მიღებული გადაწყვეტილება, ხოლო წინამდებარე კოდექსის გათვალისწინებულ შემთხვევებში - მსაჯის გადაწყვეტილებით, მატჩამდე, მატჩის დროს და მატჩის შემდეგ.

2. პირის მიმართ, რომელმაც განახორციელა დისციპლინარული დარღვევა, შეიძლება გამოყენებულ იქნეს წინამდებარე თავით გათვალისწინებული სპორტული სანქცია.

თავი III . სანქციები

10. სადისციპლინო სანქციები

1. ჩამოთვლილი სადისციპლინო სანქციები შეიძლება გამოყენებულ იქნას როგორც ფიზიკური, ასევე, იურიდიული პირების მიმართ:

ა) შენიშვნა; ბ) ჯარიმა;

გ) ჯილდოს ჩამორთმევა.

ე) შფა-ს ეგიდით გამართულ ჩემპიონატებში მონაწილეობის აკრძალვა:

2. ჩამოთვლილი სადისციპლინო სანქციები გამოიყენება მხოლოდ ფიზიკური პირების მიმართ: ა) გაფრთხილება;

ბ) გაძევება;

გ) დისკვალიფიკაცია მატჩების გარკვეული რაოდენობით, ან გარკვეული დროით; დ) გასახდელ ოთახში ან/და ტექნიკურ ზონაში ყოფნის აკრძალვა;

ე) სტადიონის ტერიტორიაზე შესვლის აკრძალვა;

3. ჩამოთვლილი სადისციპლინო სანქციები გამოიყენება მხოლოდ იურიდიული პირების და საინიციატივო ჯგუფის ფორმით რეგისტრირებული გუნდების მიმართ:

ა) ტრანსფერის განხორციელების და ფეხბურთელის რეგისტრაციის აკრძალვა; ბ) კონკრეტულ სტადიონზე მატჩების ჩატარების აკრძალვა;

გ) მატჩის შედეგის გაუქმება;

დ) ქულების ჩამოკლება;

ე) რანგით დაბალ ლიგაში დაქვეითება;

ვ) მიმდინარე ან/და სამომავლოდ დაგეგმილი ჩემპიონატიდან გარიცხვა; ზ) ტექნიკური მარცხის მინიჭება;

თ) მატჩის გადათამაშება;

მუხლი 11. შენიშვნა

შენიშვნა არის სადისციპლინო სანქცია, რომელსაც აწესებს შფა-ის სადისციპლინო ორგანო და გამოხატულია პირისათვის წერილობითი შეტყობინების სახით, წესების დაცვის აუცილებლობის მნიშვნელობის შესახებ, მომავალში დარღვევის განხორციელების შემთხვევაში უფრო მკაცრი სანქციის გამოყენების შესაძლებლობით.

მუხლი 12. ჯარიმა

1. სადისციპლინო ორგანოების მიერ ჯარიმის დაწესება ხდება ეროვნულ ვალუტაში (ლარში).

2. ფიზიკური პირისთვის დაწესებული ჯარიმის ოდენობა არ უნდა იყოს 100 ლარზე ნაკლები, ხოლო, იურიდიული პირისთვის - 300 ლარზე ნაკლები. ამასთანავე, ერთჯერადი ჯარიმის ოდენობა არ უნდა აღემატებოდეს ფიზიკური პირისთვის - 500 ლარს, ხოლო იურიდიული პირისთვის - 2 500 ლარს.

3. სადისციპლინო კომიტეტი თავად განსაზღვრავს ჯარიმის გამოყენების წესს, კონკრეტულ შემთხვევაში ჯარიმის ოდენობას და ჯარიმის გადახდის ვადას, რომელიც არ შეიძლება იყოს 7 დღეზე ნაკლები და არ უნდა აღემატებოდეს 15 დღეს გადაწყვეტილების მიღებიდან.

4. სადისციპლინო კომიტეტი უფლებამოსილია დასაბუთებული მიმართვის საფუძველზე მოახდინოს ჯარიმის თანხის გადახდის გადავადება.

5. კლუბები/გუნდები თანაბრად პასუხისმგებლები არიან იმ ჯარიმებზე, რომლებიც დაწესებულია მათი ოფიციალური წარმომადგენლების, ფეხბურთელების ან/და სხვა პირების მიმართ.

6. კლუბის/გუნდის მიერ ოფიციალური წარმომადგენლის, ფეხბურთელის ან/და სხვა პირის შემადგენლობიდან ამორიცხვა ან გათავისუფლება დაკავებული პოსტიდან მას არ ათავისუფლებს ჯარიმის გადახდის ვალდებულებისგან.

7. ფიზიკური ან/და იურიდიული პირები, რომლებიც მათ მიმართ ჯარიმის დაწესების შემდეგ შეწყვეტენ ასპარეზობას შფა-ს მიერ ორგანიზებულ გათამაშებაში, გუნდში რეგისტრირებული ვერცერთი მოთამაშე ვეღარ მიიღებს ჩემპიონატში მონაწილეობას აღნიშნული ჯარიმის სრულად დაფარვამდე.

8. ჯარიმის გადახდა უნდა განხორციელდეს შფა-ის საბანკო ანგარიშზე თანხის ჩარიცხვის გზით. დაჯარიმებულ პირს საბანკო ანგარიშის რეკვიზიტები ეგზავნება სადისციპლინო ორგანოს საბოლოო გადაწყვეტილებასთან ერთად ელ-ფოსტის საშუალებით.

მუხლი 13. ჯილდოს ჩამორთმევა

პირს, რომელსაც სადისციპლინო სანქციად დაუწესდა ჯილდოს ჩამორთმევა, უნდა ჩამოერთვას სადისციპლინო გადაწყვეტილებაში მითითებული ჯილდო, კერძოდ, ფულადი თანხა ან/და სიმბოლური ნიშნები (მედალი, თასი, პრიზი და სხვა).

მუხლი 14. გაფრთხილება

1. გაფრთხილება არის სადისციპლინო სანქცია, რომელსაც იყენებს მთავარი მსაჯი მოთამაშის მიმართ მატჩამდე, მატჩის დროს ან/და მატჩის შემდეგ, თამაშის წესების შესაბამისად და გამოიხატება ფეხბურთელისთვის ყვითელი ბარათის ჩვენებაში.

2. ფეხბურთელის მიერ ერთ მატჩში მიღებულ ორ გაფრთხილებას მოჰყვება მისი გაძევება (არაპირდაპირი წითელი ბარათით) და შესაბამისად, იგი ავტომატურად ტოვებს მომდევნო 2 მატჩს.

3. იმ შემთხვევაში, თუ სადისციპლინო სანქციის გამოყენებისათვის მნიშვნელოვანია გაფრთხილებების რაოდენობა, ფეხბურთელის მიერ ერთი მატჩის განმავლობაში ორი გაფრთხილების მიღება განიხილება, როგორც გაძევება და ასეთი გაფრთხილება არ იქნება გათვალისწინებული გაფრთხილებების საერთო რაოდენობის დათვლისას. თუ ფეხბურთელი ერთი და იმავე მატჩში ყვითელი ბარათის მიღების შემდეგ სხვა დარღვევისათვის მიიღებს პირდაპირ წითელ ბარათს, მაშინ ყვითელი ბარათი ჩაითვლება მიღებული ყვითელი ბარათების საერთო რაოდენობაში.

4. შფა-ს ჩემპიონატებში გაფრთხილებების ლიმიტი და ასეთი გაფრთხილებების გამო მატჩების გამოტოვების წესები დგინდება კონკრეტული ჩემპიონატის საშეჯიბრო დებულებით.

5. ლიგის ფორმატით ჩატარებულ ჩემპიონატში მიღებული გაფრთხილებები არ ვრცელდება თასის გათამაშების ფორმატით ჩატარებულ ჩემპიონატებზე და პირიქით. ეს წესი არ მოქმედებს შფა-ს სადისციპლინო ორგანოს მიერ სანქციის სახით ვადიანი დისკვალიფიკაციის გამოყენების შემთხვევებზე, მოქმედებს მხოლოდ მატჩების ოდენობით განსაზღვრულ დისკვალიფიკაციაზე.

6. იმ შემთხვევაში, თუ მატჩი რაიმე მიზეზით შეწყდა და მიღებულია გადაწყვეტილება შეწყვეტილი მატჩის გაგრძელების შესახებ, მაშინ ამ მატჩის დროს მიღებული ნებისმიერი გაფრთხილება ძალაშია.

7. იმ შემთხვევაში, თუ გუნდი რაიმე მიზეზის გამო გამოეთიშა ჩემპიონატს ან აღარ აგრძელებს მონაწილეობას, ამ გუნდის ფეხბურთელების მიერ მიღებული გაფრთხილებები ძალაში რჩება.

8. ჩემპიონატის მსვლელობისას სხვა გუნდში/კლუბში გადასულ ფეხბურთელებს თან გადაჰყვებათ მიღებული გაფრთხილებები, გაძევებები და დისციპლინური სანქციები.

9. ერთი სეზონის მსვლელობისას მიღებული გაფრთხილებები არ გადადის მომდევნო სეზონზე, გარდა სადისციპლინო კომიტეტის მიერ გამოყენებული სანქციებისა.

მუხლი 15. გაძევება

1. გაძევება არის სადისციპლინო სანქცია, რომელიც გამოიყენება მსაჯის მიერ მატჩის მონაწილეთა მიმართ, მატჩამდე, მატჩის დროს და მატჩის შემდეგ, თამაშის წესების დარღვევისათვის და გამოიხატება მსაჯის მოთხოვნაში - დამრღვევმა პირმა დატოვოს საფეხბურთო მინდორი და მიმდებარე ტერიტორია (ტექნიკური ზონის ჩათვლით). გაძევებულს შეიძლება მიეცეს ტრიბუნაზე დაჯდომის უფლება, თუ მას არ მიეთითება ორგანიზატორების მხრიდან სტადიონის ტერიტორიის დატოვება.

2. გაძევება ავტომატურად იწვევს მომდევნო თამაშის გამოტოვებას, იმ შემთხვევაშიც კი თუ იგი მიღებულია იმ მატჩში, რომელიც შემდგომ შეწყდა ან მისი შედეგი გაუქმდა. სადისციპლინო კომიტეტს შეუძლია გაზარდოს დისკვალიფიკაცია წინამდებარე კოდექსის შესაბამისად.

3. ლიგის ფორმატით გამართული ჩემპიონატის მატჩებში მიღებული წითელი ბარათი არ მოქმედებს თასის ფორმატით გამართული ჩემპიონატის მატჩებში და პირიქით. ეს წესი არ ვრცელდება იმ შემთხვევაში თუ სადისციპლინო კომიტეტის მხრიდან დარღვევის ხასიათიდან გამომდინარე პირს დაეკისრება დამატებითი სანქცია.

მუხლი 16. დისკვალიფიკაცია მატჩების გარკვეული რაოდენობით, ან გარკვეული დროით

1. დისკვალიფიკაცია არის სადისციპლინო სანქცია, რომელიც დაწესებულია სადისციპლინო კომიტეტის მიერ, ავტომატური დისკვალიფიკაციის შემთხვევების გამოკლებით და გამოიხატება ჩემპიონატებში მონაწილეობის უფლების აკრძალვით.

2. დისკვალიფიკაცია გამოიყენება, როგორც ფეხბურთელის, ასევე, გუნდის/კლუბის ოფიციალური წარმომადგენლების მიმართ.

3. დისკვალიფიცირებული პირი არ უნდა იყოს შეყვანილი მატჩის ოქმში. დისკვალიფიცირებულ ოფიციალურ წარმომადგენელს არ აქვს უფლება მატჩამდე, მატჩის დროს და მატჩის შემდეგ შეასრულოს ჩემპიონატის დებულებით გათვალისწინებული თავისი მოვალეობები, ასევე, ის არ უნდა იმყოფებოდეს ტექნიკურ ზონაში და გასახდელში.

4. დისკვალიფიკაცია განისაზღვრება მატჩების ან/და გარკვეული დროის (დღეები, თვეები ან წლები) ოდენობით.

5. მიმდინარე სეზონში განუხორციელებელი ან დაუსრულებელი დისკვალიფიკაცია (ავტომატური დისკვალიფიკაციის ჩათვლით) გადადის მომდევნო სეზონზე, ხოლო ყვითელი ბარათების გამო გამოწვეული სანქცია არ გადადის მომდევნო სეზონზე.

6. ფეხბურთელებზე და ოფიციალურ წარმომადგენლებზე დაწესებული ყველა დისკვალიფიკაცია ძალაში რჩება მათი სხვა გუნდში გადასვლისას, ეს წესი ვრცელდება იმ შემთხვევაშიც თუ გუნდი რაიმე მიზეზით გამოეთიშა ჩემპიონატს.

7. თუ მატჩის გამოტოვებასთან ერთად დაწესებულია ჯარიმა, მატჩის გამოტოვება შეიძლება გახანგრძლივდეს, ვიდრე არ მოხდება ჯარიმის მთლიანად გადახდა.

მუხლი 17. გასახდელში შესვლის და/ან ტექნიკურ ზონაში ყოფნის აკრძალვა

გასახდელში შესვლის და/ან ტექნიკურ ზონაში ყოფნის აკრძალვა არის სადისციპლინო სანქცია, რომელიც ართმევს უფლებას პირს, შევიდეს გუნდის გასახდელში და/ან იმყოფებოდეს სათამაშო მოედნის მიმდებარე ტერიტორიაზე, კერძოდ კი ტექნიკურ ზონაში.

მუხლი 18. სტადიონის ტერიტორიაზე შესვლის აკრძალვა

სტადიონზე შესვლის აკრძალვა არის სადისციპლინო სანქცია, როდესაც პირს არა აქვს ერთ ან რამოდენიმე სტადიონის ტერიტორიაზე შესვლის უფლება.

მუხლი 19. შფა-ს ეგიდით გამართულ ჩემპიონატებში მონაწილეობის აკრძალვა

1. შფა-ს ეგიდით , გამართულ ჩემპიონატებში მონაწილეობის აკრძალვა არის სადისციპლინო სანქცია, რომელიც სადისციპლინო ორგანოს მიერ არის დაწესებული და გამოიხატება პირის მიმართ განსაზღვრული დროით ან უვადოდ, შფა-ის ეგიდით, ფეხბურთთან დაკავშირებული ნებისმიერი საქმიანობის აკრძალვაში.

2. პირი, რომლის მიმართაც გამოიყენება აღნიშნული სანქცია, არ შეიძლება შეყვანილი იყოს ჩემპიონატის განაცხადში, ფეხბურთელის, მწვრთნელის, წარმომადგენლის, ხელმძღვანელის ან/და სხვა რანგში. მას არ შეუძლია განახორციელოს სამსაჯო და სადამკვირვებლო საქმიანობა, ასევე იყოს მატჩის დელეგატი, კოორდინატორი და აწარმოოს ნებისმიერი სხვა საქმიანობა ფეხბურთის სუბიექტებში ან ფეხბურთის სუბიექტების დავალებით შფა-ის ეგიდით გამართულ ჩემპიონატებში.

მუხლი 20. ტრანსფერის განხორციელების და ფეხბურთელის რეგისტრაციის აკრძალვა

ტრანსფერების განხორციელების და ფეხბურთელების რეგისტრაციის აკრძალვა არის სადისციპლინო სანქცია, როდესაც კლუბს/გუნდს ეკრძალება ფეხბურთელების რეგისტრაცია სატრანსფერო პერიოდში ან/და სეზონის განმავლობაში, სადისციპლინო ორგანოს მიერ განსაზღვრული პერიოდით.

მუხლი 21. კონკრეტულ სტადიონზე მატჩების ჩატარების აკრძალვა

კონკრეტულ სტადიონზე მატჩების ჩატარების აკრძალვა არის სადისციპლინო სანქცია, დაწესებული სადისციპლინო ორგანოს მიერ, რომელიც განსაზღვრული ვადით დამრღვევ კლუბს/გუნდს უკრძალავს მატჩების ჩატარებას კონკრეტულ სტადიონზე.

მუხლი 22. მატჩის შედეგის გაუქმება

1. მატჩის შედეგების გაუქმება სადისციპლინო ორგანოს მიერ დაწესებული სადისციპლინო სანქციაა, რომელიც გამოხატულია განსაზღვრული მატჩის შედეგების გაუქმებაში.

2. მატჩის შედეგების გაუქმებას შეიძლება მოჰყვეს გადათამაშების დანიშვნა ან მატჩში მონაწილე ერთერთი ან ორივე გუნდისათვის ტექნიკური მარცხის მინიჭება. მატჩის შედეგის გაუქმება ხორციელდება წინამდებარე კოდექსით ან ჩემპიონატის დებულებით, ხოლო იმ შემთხვევებში, როცა აღნიშნული რეგულაციებით არ არის განსაზღვრული მატჩის შედეგის გაუქმება - სადისციპლინო ორგანოს გადაწყვეტილებით.

3. მატჩის შედეგების გაუქმება, როგორც სანქცია, შესაძლებელია გამოყენებულ იქნეს, როგორც შფა- ის მიერ ორგანიზებული ჩემპიონატის დასრულების შემდეგ, ასევე, ჩემპიონატის დასრულებამდე. თუ აღნიშნული სანქცია სადისციპლინო ორგანოს მიერ დაწესებულია შფა-ის ჩემპიონატის დასრულების შემდეგ, ასეთ შემთხვევაში, შფა-ის საშეჯიბრო კომიტეტს ჩემპიონატის საბოლოო შედეგებში შეაქვს შესაბამისი ცვლილებები. იმ შემთხვევაში, თუ დარღვევა განხორციელდა ჩემპიონატის წინა ეტაპზე და გამოვლინდა შემდგომი ეტაპის მიმდინარეობისას (მაგალითად, დარღვევა მოხდა მუნიციპალურ ან რეგიონულ ეტაპზე, ხოლო გამოვლინდა ფინალური ეტაპის მიმდინარეობისას), შედეგებში ცვლილებები შესაძლოა განხორციელდეს, თუმცა, მიმდინარე ეტაპი გაგრძელდება არსებული მონაწილეებით.

მუხლი 23. ქულების ჩამოკლება

1. ქულების ჩამოკლება არის სადისციპლინო სანქცია, დაწესებული სადისციპლინო ორგანოს მიერ, რაც გამოიხატება კლუბის/გუნდის მიერ მოპოვებული ქულების ჩამორთმევაში, იმ ჩემპიონატებში, რომელშიც იგი იღებდა მონაწილეობას და რომელიც ტარდება ლიგის სისტემით, სადაც დაკავებული ადგილების განაწილება ხორციელდება დაგროვილი ქულების შესაბამისად.

2. გადაწყვეტილება ქულების ჩამოკლების შესახებ მიიღება ჩემპიონატის დასრულებამდე, თუ წინამდებარე კოდექით სხვა რამ არ არის განსაზღვრული.

3. თუ წინამდებარე კოდექსით გათვალისწინებულ შემთხვევებში, სადისციპლინო ორგანოს მიერ ქულების დაკლების შესახებ გადაწყვეტილება მიიღება ჩემპიონატის დასრულების შემდეგ და ჩემპიონატის ახალი სეზონის დაწყებამდე, სადისციპლინო ორგანო იღებს გადაწყვეტილებას კლუბისთვის/გუნდისთვის ქულების დაკლების თაობაზე ჩემპიონატის მომავალ სეზონში.

4. კონკრეტულ შემთხვევებში, ჩამოკლებული ქულების ოდენობას განსაზღვრავს სადისციპლინო ორგანო.

მუხლი 24. რანგით დაბალ ლიგაში დაქვეითება

1. სადისციპლინო ორგანოს გადაწყვეტილებით კლუბი/გუნდი შესაძლებელია დაქვეითდეს რანგით დაბალ ლიგაში შფა-ის ჩემპიონატის საშეჯიბრო დებულებით განსაზღვრული ლიგების სტრუქტურის შესაბამისად.

2. იმ შემთხვევაში, თუ დამრღვევი კლუბი/გუნდი ასპარეზობს ისეთ ლიგაში, რომელსაც შფა-ის ჩემპიონატის საშეჯიბრო დებულების მიხედვით არ გააჩნია რანგით დაბალი ლიგა, ეს სანქცია არ გამოიყენება და სადისციპლინო ორგანო მიიღებს გადაწყვეტილებას სხვა, პროპორციული სანქციის დაკისრების თაობაზე.

მუხლი 25. მიმდინარე ან/და სამომავლოდ დაგეგმილი ჩემპიონატიდან გარიცხვა

1. ჩემპიონატიდან გარიცხვა არის სადისციპლინო სანქცია, დაწესებული სადისციპლინო ორგანოს მიერ, რომელიც გამოხატულია გუნდისთვის მონაწილეობის უფლების ჩამორთმევაში მიმდინარე და/ან სამომავლოდ დაგეგმილ ჩემპიონატებში და გამოიყენება წინამდებარე კოდექსით და ჩემპიონატის საშეჯიბრო დებულებით გათვალისწინებულ შემთხვევებში.

2. აღნიშნული სანქციის გამოყენების შემთხვევაში, გუნდი შესაძლებელია გარიცხულ იქნას შფა-ის მიერ ორგანიზებული ნებისმიერი ჩემპიონატიდან და აეკრძალოს ყველა ჩემპიონატში ასპარეზობა.

მუხლი 26. ტექნიკური მარცხის მინიჭება

1. ტექნიკური მარცხის მინიჭება არის სადისციპლინო სანქცია, დაწესებული სადისციპლინო ორგანოს მიერ, რომელიც აუქმებს ჩატარებული მატჩის შედეგს და დამრღვევ გუნდს ან გუნდებს უთვლის დამარცხებას ანგარიშით 0-5.

2. გუნდი, რომელსაც ენიჭება დამარცხება, ითვლება მატჩში წაგებულად, ხოლო მოწინააღმდეგე არის მოგებული, გარდა იმ შემთხვევისა როცა ორივე გუნდს მიენიჭება დამარცხება.

3. თუ, გუნდმა, რომელსაც მიენიჭა დამარცხება, მატჩი წააგო 0-5-ზე მეტი სხვაობით, მაშინ მატჩში დაფიქსირებული ანგარიში ძალაში რჩება.

4. გუნდისთვის დამარცხების მინიჭების შემთხვევაში, ძალაშია მატჩში მონაწილე ფეხბურთელებისა და კლუბის ოფიციალური წარმომადგენლების მიმართ დაწესებული სანქციები.

5. MASTER LEAGUE-სსაშეჯიბრო კომიტეტის მიერ დამტკიცებული კალენდრის მიხედვით დანიშნულ ოფიციალურ მატჩზე გუნდის გამოუცხადებლობის შემთხვევაში, ასეთ გუნდს ეთვლება დამარცხება ანგარიშით 0-5.

მუხლი 27. მატჩის გადადება და გადათამაშება

1. მატჩი შეიძლება იქნას გადათამაშებული, თუ ის დაიწყო და ვერ დასრულდა ფორს-მაჟორული მიზეზების გამო.

2. მატჩი შეიძლება იქნას გადადებული, თუ ის ვერ ჩატარდა - ვერ დაიწყო, გონივრული საფუძვლით.

3. ფორს მაჟორული მიზეზების გამო შეწყვეტილი მატჩი შესაძლებელია გაგრძელდეს სხვა დღეს შეწყვეტისას არსებული სათამაშო დროიდან. ასეთ შემთხვევაში, მსაჯის მიერ გამოყენებული გაფრთხილებები და გაძევებები ძალაში რჩება.

მუხლი 28. სხვა გონივრული სანქცია

შფა-ს სადისციპლინო კოდექსისა და შესაბამისი დებულების რეგულირების დარღვევის განსაკუთრებულ შემთხვევებში, შფა-ს სადისციპლინო კომიტეტი უფლებამოსილია გამოიყენოს სხვა გონივრული სანქცია, რომელიც არ არის განსაზღვრული ამ კოდექსის მე-10 მუხლით.

თავი IV. სანქციის გამოყენება, ხანდაზმულობა და დისციპლინური განხილვა

მუხლი 29. გადაწყვეტილების მიმღები ორგანო

1. კოდექსით გათვალისწინებული დისციპლინური დარღვევის შემთხვევაში, შესაბამისი ლიგის ხელმძღვანელს უფლება აქვს ერთპიროვნულად მიიღოს გადაწყვეტილება კოდექსით გათვალისწინებული სანქციის გამოყენების შესახებ;

2. დარღვევის შინაარსის, ხასიათის და მასშტაბის გათვალისწინებით შესაბამისი ლიგის ხელმძღავნელი უფლებამოსილია საკითხი განსახილველად გადასცეს სადისციპლინო კომიტეტს;

3. იმ შემთხვევაში თუ დამრღვევი პირი არ ეთანხმება მსაჯის გადაწყვეტილებას მას უფლება აქვს გადაწყვეტილება გაასაჩივროს შესაბამისი ლიგის ხელმძღავნელთან, ხოლო შესაბამისი ლიგის ხელმძღვანელის გადაწყეტილება დისციპლინური სანქციის გამოყენების შესახებ, გააჩივროს გადაწყვეტილება მისი გაცნობიდან 3 დღის ვადაში წერილობითი ფორმით გაასაჩივროს სადისციპლინო კომიტეტში;

4. სადისციპლინო კომიტეტი ასევე, უფლებამოსილია თავისი ინიციატივით დაიწყოს საქმის მოკვლევა.

5. სადისციპლინო კომიტეტი შედგება 2 კოლეგიისგან.

მუხლი 30. სადისციპლინო კომიტეტი

1.სადისციპლინო კომიტეტის პირველი კოლეგია შედგება 5 (ხუთი) წევრისაგან: (ინგა ბედიაშვილი, დავით ჩიქვანაია, შოთა კალანდაძე, გიორგი ცხვედიანი, გიორგი დუმბაძე)

2.სადისციპლინო კომიტეტის მეორე კოლეგია შედგება 3 (სამიი) წევრისაგან: (აკაკი ხლაბუსტოვი, ლაშა ჭეიშვილი და ლაშა ჩალაძე)

3. მეორე კოლეგია საქმეს განიხილავს მხოლოდ იმ შემთხვევაში, თუ პირველ კოლეგიას მთლიანად ან/და რომელიმე წევრს აქვს ინტერესთა კომფლიქტი.

4. თითოეულ დისციპლინარულ დარღვევასთან დაკავშირებით შემოსულ საჩივრებს, ლიგის ხელმძღავნელის მიმართვის ან სადისციპლინო კომიტეტის მიერ საკუთარი ინიციატივით დაწყებულ საქმისწარმოებას, სადისციპლინო კომიტეტი განიხილავს 3 წევრის შემადგენლობით, დაუშვებელია სადისციპლინო კომიტეტის შემადგენლობაში ირიცხებოდეს პირი, რომელიც თამაშობს ან/და საქმიანობს იმავე ლიგაში, რომლის საჩივრის განხილვაც ხდება.

5. გადაწყვეტილება მიიღება ხმათა უმრავლესობით ზეპირი მოსმენით ან მის გარეშე.

6. სადისციპლინო კომიტეტი უფლებამოსილია:

1. გამოიტანოს სპორტული სანქცია დისციპლინური დარღვევის დროს.

2. გამოასწოროს მსაჯის მიერ დაშვებული შემდეგი სახის შეცდომები:

ა) მოთამაშის გაფრთხილება ან გაძევება შეცდომით, სხვა მოთამაშის ნაცვლად.

ბ)მოთამაშის სათამაშო მინდორზე დატოვება მისთვის მატჩში მეორე გაფრთხილების ჩვენებისას. გ) სხვა სახის შეცდომები.

3. მსაჯის მიერ გამოტანილი სანქციის გარდა, პირის მიმართ გამოიყენოს ამ კოდექსით განსაზღვრული დამატებითი სანქციები.

4. შფა-ს ორგანოების გადაწყვეტილების შეუსრულებლობისათვის გამოიყენოს წინამდებარე კოდექსით გათვალისწინებული სანქციები.

5. განიხილოს წინამდებარე კოდექსის შესაბამისად შემოტანილი საჩივრები და განცხადებები, მათ შორის განცხადებები ამინისტიის და სანქციის გადახედვის შესახებ..

6. დისციპლინური დარღვევისათვის საქმის წარმოების აღძვრის საფუძვლად ითვლება მონაცემები, რომლებიც მიუთითებენ სადისციპლინო დარღვევის არსებობაზე:

ა. მატჩის ოქმში;

ბ.გუნდების ოფიციალური წარმომადგენლების ან/და მოთამაშეების წერილობით განცხადებებში და საჩივრებში.

გ. მსაჯის, დელეგატის ან/და მატჩის მომსახურე პირების მოხსენებით ბარათებში.

დ. სხვა სახის მონაცემები, რომელიც კომიტეტის მიერ მიჩნეული იქნება რელევანტურად.

7. შფა-ს სადისციპლინო კომიტეტს უფლება აქვს საკუთარი ინიციატივით აღძრას საქმის წარმოება დისციპლინური დარღვევის შემთხვევაში და გამოიყენოს ამ კოდექსით განსაზღვრული სანქციები.

მუხლი 31. განხილვის ვადები და ხანდაზმულობა

1. სადისციპლინო კომიტეტი უფლებამოსილია განსახილველად მიიღოს სადისციპლინო კოდექსის დარღვევასთან დაკავშირებული საჩივრები დარღვევის გამოვლენიდან 3 (სამი) კალენდარული დღის ვადაში. სადისციპლინო კომიტეტი საჩივარს განიხილავს და მხარეებს გადაწყვეტილებას აცნობებს ელექტრონული ფოსტის მეშვეობით, საჩივრის მიღებიდან არაუმეტეს 20 (ოცი) კალენდარული დღის განმავლობაში.

2. სადისციპლინო კომიტეტი უფლებამოსილია უარი თქვას საჩივრის მიღებაზე თუ: ა. საჩივარი შეტანილია არაუფლებამოსილი პირის მიერ;

ბ. საჩივარი შეტანილია სასამართლოს მიერ ქმედუუნაროდ აღიარებული პირის მიერ; გ. დაღვეულია საჩივრის წარდგენისთვის განსაზღვრული ფორმა;

დ. გასულია ამ კოდექსით დადგენილი გასაჩივრების ვადა.

3. სადისციპლინო კომიტეტის მიერ მიღებული გადაწყვეტილება საბოლოოა და არ საჩივრდება.

მუხლი 32. საჩივრის ფორმა

1. სადისციპლინო კომიტეტში საჩივრის წარდგენა ხდება წერილობითი ფორმით.

2. საჩივარი შეიძლება წარადგინოს:

ა. გუნდის ოფიციალურმა წარმომადგენელმა; ბ. მატჩის დელეგატმა;

გ. გუნდის მწვრთმელმა ან გუნდის კაპიტანმა;

3. საჩივარი შეიძლება წარდგენილ იქნას წარმომადგენლის მეშვეობით ნოტარიულად დამოწმებული მინდობილობის საფუძველზე.

4. საჩივარი უნდა შეიცავდეს:

ა. კომიტეტის დასახელებას, რომელშიც შეაქვთ საჩივარი;

ბ. საჩივრის შემტანი პირის სახელი, გვარი, საიდენტიფიკაციო ნომერი, იურიდიული ან ფაქტობრივი მისამართი, აგრეთვე არსებობის შემთხვევაში ალტერნატიული მისამართი, სამუშაო ადგილის მისამართი, ტელეფონის ნომერი, მათ შორის, მობილურის, ელექტრონული ფოსტის მისამართი. საჩივარში შესაძლოა ასევე მიეთითოს საკონტაქტო პირის მონაცემები.

გ. დავის საგანი;

დ. კონკრეტული ფაქტები და გარემოებები, რომლებზეც საჩივრის წარმდგენი პირი ამყარებს თავის მოთხოვნებს;

ე. მტკიცებულებები, რომლებიც ადასტურებს საჩივრის წარმდგენი პირის მიერ მითითებულ გარემოებებს;

ვ. საჩივრის წარმდგენი პირის მოთხოვნა;

ზ. სამართლებრივი საფუძვლები, რომლებზეც საჩივრის წარმდგენი პირი ამყარებს თავის მოთხოვნებს;

თ. საჩივრისათვის დართული დოკუმენტების ნუსხა;

5. საჩივარი ხელმოწერილი უნდა იყოს საჩივრის წარმდგენი პირის მიერ.

მუხლი 33. მტკიცებულებები

1. დისციპლინური დარღვევის საქმეზე მტკიცებულებებად ითვლება ნებისმიერი მასალა, რომლის საფუძველზე სადისციპლინო კომიტეტი ადგენს იმ გარემოებების არსებობას ან არარსებობას, რომლებსაც მნიშვნელობა აქვს საქმისთვის და რომელთა საფუძველზეც სადისციპლინო კომიტეტი იღებს გადაწყვეტილებას.

2. მტკიცებულების სახით მიიღება:

ა. მატჩის ოქმები;

ბ. პირების, რომელთა მიმართ მიმდინარეობს საქმის წარმოება, მოწმეებისა და სხვა პირების განცხადებები და განმარტებები;

გ. აუდიო და ვიდეო ჩანაწერები, ფოტოები;

დ. სპეციალისტების დასკვნები და განმარტებები;

ე. სხვა დოკუმენტები, რომლებსაც მნიშვნელობა აქვს საქმესთან; ვ. ნივთიერი მტკიცებულებები.

3. დაუშვებელია იმ მტკიცებულებების გამოყენება, რომლებიც აშკარად არ შეესაბამებიან განსახილველ საქმეს.

4. სადისციპლინო კომიტეტი აფასებს მტკიცებულებებს თავისი შინაგანი რწმენით, რომელიც ემყარება ყოველმხრივ სრულ და ობიექტურ გამოკვლევას საქმის ყველა გარემოებასთან ერთობლიობაში.

5. მტკიცებულებების მოპოვებას უზრუნველყოფენ მხარეები. მტკიცების ტვირთი ეკისრება საჩივრის წარმდგენ პირს. განხილვა მიმდინარეობს ზეპირი მოსმენით ან მის გარეშე.

მუხლი 34. სადისციპლინო კომიტეტის გადაწყვეტილება

1. სადისციპლინო კომიტეტი საჩივარს განიხილავს ზეპირი მოსმენით ან მის გარეშე და გადაწყვეტილებას იღებს წერილობითი ფორმით.

2. გადაწყვეტილება შედგება შესავალი, აღწერილობითი, სამოტივაციო და სარეზოლუციო ნაწილებისაგან.

3. გადაწყვეტილების შესავალ ნაწილში აღინიშნება მისი გამოტანის დრო და ადგილი, გადაწყვეტილების გამომტანი კომიტეტის დასახელება და შემადგენლობა, მხარეები, წარმომადგენლები, დავის საგანი.

4. გადაწყვეტილების აღწერილობით ნაწილში მოკლედ უნდა მიეთითოს საჩივრის წარმდგენი პირის მოთხოვნა, მოპასუხის პოზიცია ამ მოთხოვნასთან დაკავშირებით, კომიტეტის მიერ დადგენილი გარემოებანი, მტკიცებულებანი, რომლებსაც ემყარება მისი დასკვნები, მოსაზრებანი, რომლებითაც კომიტეტი უარყოფს ამათუიმ მტკიცებულებას.

5. გადაწყვეტილების სამოტივაციო ნაწილში უნდა აღინიშნოს სამართლებრივი შეფასება და საფუძვლები, რომლებითაც კომიტეტი ხელმძღვანელობდა.

6. გადაწყვეტილების სარეზოლუციო ნაწილი უნდა შეიცავდეს კომიტეტის დასკვნას საჩივრის დაკმაყოფილების ან უარის თქმის შესახებ.

7. სადიციპლინო კომიტეტი უფლებამოსილია გამოაქვეყნოს გადაწყვეტილების მხოლოდ სარეზოლუციო ნაწილი და განსაზღვროს დასაბუთებული გადაწყვეტილების მომზადების ვადა.

მუხლი 35. კომბინირებული სანქციების გამოყენება

წინამდებარე კოდექსით გათვალისწინებულ შემთხვევებში ერთი დისციპლინური დარღვევის ჩადენისათვის სადისციპლინო ორგანოს შეუძლია ერთდროულად გამოიყენოს რამდენიმე სანქცია.

მუხლი 36. სანქციების გამოყენება დისციპლინური დარღვევების ერთობლიობისას

1. წინამდებარე კოდექსის შესაბამისად დისციპლინური დარღვევების ერთობლიობისას პირს ეკისრება დისციპლინური პასუხისმგებლობა ჩადენილი თითოეული დარღვევისათვის.

მუხლი 37. განცხადება ამინისტიის შესახებ

1. სანქცირებულ პირს უფლება აქვს სანქციის 1/3 -ის გასვლის შემდგომ მიმართოს განცხადებით ამინისტიის ან/და სანქციის შემცირების მოთხოვნით.

2. განცხადება ამინისტიის ან/და სანქციის შემცირების შესახებ განიხილება მისი რეგისტრაციიდან 5 კალენდარული დღის ვადაში და გადაწყვეტილება დაინტერესებულ პირს ეცნობება წერილის სახით.

3. ამ მუხლით განსაზღვრული განცხადებების განხილვის დროს სადისციპლინო კომიტეტი მხედველობაში იღებს პირის რეპუტაციას და ქმედებებს მისი სანქცირების შემდეგ.

მუხლი 38. ხარჯები

1. სადისციპლინო კომიტეტისათვის წინამდებარე კოდექსით განსაზღვრული წესით გუნდის/კლუბის მიერ სადისციპლინო საჩივრით მიმართვის შემთხვევაში სადისციპლინო შენატანი შეადგენს თითოეულ მოთხოვნაზე 100 (ასი) ლარს. აღნიშნული არ გულისხმობს სადისციპლინო კომიტეტისათვის ინფორმაციის მიწოდების შემთხვევას.

თავი V. სპეციალური ნაწილი

მუხლი 39. დარღვევები მატჩის ოფიციალური პირების მიმართ მატჩამდე, მატჩის მიმდინარეობისას და მატჩის შემდეგ

1. ფეხბურთელების ან კლუბის ოფიციალური წარმომადგენლების შეურაცხმყოფელი ქცევა, ანუ მიუღებელი ლექსიკის გამოყენება, შეურაცხმყოფელი სიტყვები, დამამცირებელი საუბარი, და გამოთქმები, აგრეთვე, შეურაცხმყოფელი ჟესტები მატჩის ოფიციალური პირების მიმართ – ისჯება 3-დან 6 მატჩამდე დისკვალიფიკაციით და ჯარიმით, 200 დან 400 ლარამდე რომლის ზუსტ ოდენობასაც განსაზღვრავს სადისციპლინო ორგანო.

2. ფეხბურთელების ან კლუბის ოფიციალური წარმომადგენლების შეურაცხმყოფელი ქცევა, ანუ მიუღებელი ლექსიკის გამოყენება, შეურაცხმყოფელი სიტყვები და გამოთქმები, რომელიც შეურაცყოფს ორგანიზაციის საქმიან რეპუტაციას, აგრეთვე, შეურაცხმყოფელი ჟესტები ჩემპიონატის ორგანიზატორის (ფიზიკური თუ იურიდიული პირი) მიმართ - ისჯება 4-დან 8 მატჩამდე დისკვალიფიკაციით და ჯარიმით, რომლის ზუსტ ოდენობასაც განსაზღვრავს სადისციპლინო ორგანო, თუმცა, ჯარიმის ოდენობა არ უნდა იყოს 300 ლარზე ნაკლები.

3. ფეხბურთელის ან კლუბის ოფიციალური წარმომადგენლის აგრესიული ქცევა მატჩამდე, მატჩის მიმდინარეობისას ან/და მატჩის შემდეგ, მათ შორის განზრახ ბიძგი, საგნების და ბურთის სროლა და სხვა აგრესიული ქცევა მატჩის ოფიციალური პირ(ებ)ის მიმართ – ისჯება 3 მატჩიანი დისკვალიფიკაციით.

4. შეფურთხება, ჩადენილი ფეხბურთელის ან კლუბის ოფიციალური წარმომადგენლის მიერ მატჩის ოფიციალური პირების მიმართ – ისჯება 5 მატჩიანი დისკვალიფიკაციით და ჯარიმით, რომლის ზუსტ ოდენობასაც განსაზღვრავს სადისციპლინო ორგანო, მაგრამ ჯარიმის ოდენობა არ უნდა იყოს 300 ლარზე ნაკლები და არ უნდა აღემატებოდეს 500 ლარს.

5. განზრახ ხელის კვრა, ჩადენილი ფეხბურთელის ან კლუბის ოფიციალური წარმომადგენლის მიერ მატჩის ოფიციალური პირების მიმართ – ისჯება 10 მატჩამდე დისკვალიფიკაციით და ჯარიმით, რომლის ზუსტ ოდენობასაც განსაზღვრავს სადისციპლინო ორგანო, მაგრამ ჯარიმის ოდენობა არ უნდა იყოს 300 ლარზე ნაკლები და არ უნდა აღემატებოდეს 500 ლარს.

6. ფიზიკური შეურაცხყოფის მიყენების მცდელობა, ჩადენილი ფეხბურთელის ან კლუბის ოფიციალური წარმომადგენლის მიერ მატჩის ოფიციალური პირების მიმართ – ისჯება 10 მატჩამდე დისკვალიფიკაციით და ჯარიმით 500 ლარის ოდენობით.

7. ფიზიკური შეურაცხყოფის მიყენება, ფეხბურთელის ან კლუბის ოფიციალური წარმომადგენლის მიერ მატჩის ოფიციალური პირების მიმართ – ისჯება ამ პირის 12 თვიანი დისკვალიფიკაციით ან შფა-ს ორგანიზებულ სამოყვარულო საფეხბურთო ჩემპიონატებში მონაწილეობის სამუდამო აკრძალვით და ჯარიმით, რომლის ზუსტ ოდენობასაც განსაზღვრავს სადისციპლინო ორგანო, მაგრამ ჯარიმის ოდენობა არ უნდა იყოს 500 ლარზე ნაკლები, ასევე, მოხდება გუნდისათვის 6-დან 9-მდე რაოდენობის ქულების ჩამოკლება.

8. ფიზიკური შეურაცხყოფის მიყენება, ფეხბურთელის ან კლუბის ოფიციალური წარმომადგენლის მიერ მატჩის ოფიციალური პირების მიმართ, თუ ეს მოხდება გუნდისათვის სეზონის განმავლობაში მეორედ – ისჯება გუნდის ჩემპიონატიდან მოხსნით, მიმდინარე სეზონში ან შფა-ს ორგანიზებულ სამოყვარულო საფეხბურთო ჩემპიონატებში მონაწილეობის გარკვეული, უფრო ხანგრძლივი ვადით აკრძალვით და ჯარიმით, რომლის ზუსტ ოდენობასაც განსაზღვრავს სადისციპლინო ორგანო, მაგრამ ჯარიმის ოდენობა არ უნდა იყოს 500 ლარზე ნაკლები.

9. ფიზიკური შეურაცხყოფის მიყენება, ფეხბურთელების ან კლუბის ოფიციალური წარმომადგენლების მიერ (ჯამში ორი ან მეტი პირი) მატჩის ოფიციალური პირების მიმართ – ისჯება გუნდის ჩემპიონატიდან მოხსნით ან შფა-ს ორგანიზებულ სამოყვარულო საფეხბურთო ჩემპიონატებში მონაწილეობის გარკვეული, უფრო ხანგრძლივი ვადით აკრძალვით და ჯარიმით, რომლის ზუსტ ოდენობასაც განსაზღვრავს სადისციპლინო ორგანო, მაგრამ ჯარიმის ოდენობა არ უნდა იყოს 500 ლარზე ნაკლები.

10. მიმდინარე სეზონში მოხსნილი გუნდი, მომდევნო სეზონში, ასპარეზობას გააგრძელებს რანგით ქვედა ლიგაში, ასეთის არსებობის შემთხვევაში.

11. ამ მუხლში განსაზღვრული ჯარიმის გადახდაზე პასუხისმგებელია გუნდი/კლუბი და სადისციპლინო ორგანოს მიერ დადგენილ ვადაში ჯარიმის გადაუხდელობის შემთხვევაში, გუნდს/კლუბს და მის ყველა ფეხბურთელს ეკრძალება მონაწილეობა შფა-ის მიერ ორგანიზებულ ჩემპიონატებში.

მუხლი 40. ჩხუბი

1. ჩხუბი, ანუ ფეხბურთელების ან/და კლუბის ოფიციალური წარმომადგენლების რამდენიმე პირის შეტაკება, რასაც თან ახლავს დარტყმების ურთიერთ მიყენება – ისჯება 4-დან 6 მატჩამდე დისკვალიფიკაციით ან ჩემპიონატიდან მოხსნით და ჯარიმით, რომლის ზუსტ ოდენობასაც განსაზღვრავს სადისციპლინო ორგანო, მაგრამ ჯარიმის ოდენობა არ უნდა იყოს 300 ლარზე ნაკლები.

2. მასობრივი ჩხუბი, ანუ ჩხუბი ოთხზე მეტი პირის მონაწილეობით, რომლებიც არიან ფეხბურთელები ან/და კლუბის ოფიციალური წარმომადგენლები – ისჯება 5-დან 8 მატჩამდე დისკვალიფიკაციით ან კლუბის/გუნდის ჩემპიონატიდან მოხსნით და ჯარიმით, რომლის ზუსტ ოდენობასაც განსაზღვრავს სადისციპლინო ორგანო, მაგრამ ჯარიმის ოდენობა არ უნდა იყოს 800 ლარზე ნაკლები.

3. თუ, ჩხუბის დროს შეუძლებელია დამრღვევი პირის ამოცნობა, სადისციპლინო ორგანო დასჯის კლუბს/გუნდს, რომელსაც დამრღვევები მიეკუთვნებიან.

4. პირი, რომელიც ცდილობს ჩხუბის თავიდან აცილებას, სხვების დაცვას ან ჩხუბში ჩართული სხვა პირების გაშველებას, არ ისჯება.

5. ამ მუხლში განსაზღვრული ჯარიმის გადახდაზე პასუხისმგებელია გუნდი/კლუბი და სადისციპლინოორგანოს მიერ დადგენილ ვადაში ჯარიმის გადაუხდელობის შემთხვევაში, გუნდს ეკრძალება ჯარიმის სრულად დაფარვამდე შფა-ის ეგიდით გამართულ ჩემპიონატში მონაწილეობა.

მუხლი 41. ორგანიზაციის წარმომადგენლის, კოორდინატორის, მატჩის დელეგატის მოთხოვნის დაუმორჩილებლობა.

1. შფა-ს წარმომადგენლის, კოორდინატორის, მატჩის დელეგატის მითიტებისა და მოთხოვნის დაუმორჩილებლობის შემთხვევაში, ფეხბურთელი, გუნდის ოფიციალური წარმომადგენელი ან მწრთვნელი ისჯება კონკრეტული მატჩის გამოტოვებით, რომლის შესახებაც შესაბამისი პირი (ორგანიზაციის წარმომადგენლი, კოორდინატორი, მატჩის დელეგატი) ადგილზე იღებს გადაწყვეტილებას და აცნობებს შეხვედრის არბიტრს, შემდეგ კი შესაბამის მოხსენებით ბარათს წარუდგენს ორგანიზაციის სადისციპლინო კომიტეტს.

2. შფა-ს წარმომადგენელს, კოორდინატორსა და მატჩის დელეგატს უფლება აქვთ მატჩის მიმდინარეობისას კომუნიკაცია იქონიონ არბიტრთან მხოლოდ ისეთ დარღვევებზე, რომელიც არ წარმოადგენს საფეხბურთო ეპიზოდს და შეხვედრის არბიტრს გამორჩა მხედველობიდან. (მაგ: ფეხბურთელის მხრიდან დაუმორჩილებლობა, ბილწსიტყვაობა, მაპროვოცირებელი ქმედება, დამამცირებელი მოპყრობა, მოედნის თვითნებურად დატოვება და ა.შ)

3. ორგანიზაციის წარმომადგენელს, კოორდინატორსა და მატჩის დელეგატს არ აქვს უფლება ჩაერიოს მსაჯის გადაწყვეტილებაში საფეხბურთო ეპიზოდებთან დაკავშირებით. (მაგ: ჯარიმა, აუტი, კუთხური და ა.შ)

4. ამ მუხლის მე-3 ნაწილით განსაზღვრული დარღვევის შემთხვევაში დამრღვევ პირს დაეკისრება ჯარიმა 200 ლარის ოდენობით, ხოლო იგივე ქმედების განმეორების შემთხვევაში დაეკისრება ჯარიმა 400 ლარის ოდენობით.

მუხლი 42. მატჩში გუნდის გამოუცხადებლობა

1. შფა-ს მიერ ორგანიზებული საფეხბურთო ჩემპიონატის მატჩზე გუნდის/კლუბის გამოუცხადებლობის შემთხვევაში, გუნდს/კლუბს მიეცემა შენიშვნა ჩაეთვლება წაგება 0-5 და დაეკისრება ფულადი სანქცია 300 ლარის ოდენობით.

2. თუ საფეხბურთო მატჩის დაწყების დროს, გუნდის/კლუბის შემადგენლობაში არ გამოცხადდა სულ მცირე 7 (შვიდი) ფეხბურთელი, გუნდს/კლუბს ჩაეთვლება წაგება 0-5.

3. ამ მუხლის 1-ლ და მე-2 ნაწილებში განსაზღვრული ქმედებების განმეორებით ჩადენის შემთხვევაში, გუნდს/კლუბს ჩამოაკლდება ქულები, რომლის ოდენობას განსაზღვრავს სადისციპლინო კომიტეტი და ასევე დაეკისრება ფულადი ჯარიმა 500 ლარის ოდენობით.

4. ამ მუხლის მე-3 ნაწილით განსაზღვრული სანქციის გამოყენების შემდგომ, ამ მუხლის 1-ლ და მე-

2 ნაწილებში განსაზღვრული ქმედებების განმეორებით ჩადენის შემთხვევაში, გუნდი/კლუბი მოიხსნება ჩემპიონატიდან.

მუხლი 43. მატჩში მსაჯის გამოუცხადებლობა

1. შფა-სმიერ ორგანიზებული სამოყვარულოსაფეხბურთოჩემპიონატის მატჩზე მსაჯის გამოუცხადებლობის შემთხვევაში, მას აეკრძალება მსაჯობა შფა-ს მიერ ორგანიზებულ შესაბამის სამოყვარულო საფეხბურთო ჩემპიონატში.

2. თუ სამოყვარულო საფეხბურთო მატჩის დაწყების დროს, მოედანზე არ იმყოფება მსაჯთა სრული შემადგენლობა (მთავარი მსაჯი, გვერდითი მსაჯები), თითოეულ მსაჯს ეკისრება ფულადი სანქცია 100 (ასი) ლარის ოდენობით.

3. ამ მუხლის მე-2 ნაწილით განსაზღვრული ფულადი სანქცია არ დაეკისრება იმ მსაჯებს, რომელთა მოედანზე არყოფნა სამოყვარულო საფეხბურთო მატჩის დაწყების დროს, გამოწვეულია სტადიონის ტექნიკური გაუმართავობის ან სხვა ობიექტური მიზეზის შედეგად.

4. ამ მუხლის 1-ლი ნაწილით განსაზღვრული შედეგის დადგომისას, სამოყვარულო საფეხბურთო ჩემპიონატის მატჩი გადაიდება განსაზღვრული ვადით, რომლის ჩატარების დროს და ადგილს განსაზღვრავს შფა-ს საშეჯიბრო კომიტეტი.

მუხლი 44. მატჩის გადადება

1. ამ კოდექსის 43-ე მუხლით და 46-ე მუხლის მე-3 ნაწილით განსაზღვრული შედეგის დადგომისას, მატჩის გადადების შესახებ გადაწყვეტილებას იღებს და გუნდებს/კლუბებს აცნობს მხოლოდ მატჩის დელეგატი.

2. გარდა ამ მუხლის 1-ლ ნაწილში მითითებული მუხლებისა, მატჩის დელეგატი უფლებამოსილია მატჩის გადადების ან შეწყვეტის შესახებ გადაწყვეტილება მიიღოს სხვა ობიექტური მიზეზების არსებობის შემთხვევაშიც, თუ საფრთხე ექმნება ფეხბურთელების, ოფიციალური წარმომადგენლების ან/და მსაჯების სიცოცხლეს ან ჯანმრთელობას.

3. მატჩის დელეგატის მიერ, მატჩის გადადების შესახებ გადაწყვეტილების მიღება ამ მუხლის 1-ლ ან მე-2 ნაწილებში განსაზღვრული საფუძვლების გარეშე, ისჯება ჯარიმით 100 (ასი) ლარის ოდენობით.

4. ამ მუხლის მე-2 ნაწილით განსაზღვრული საფრთხის არსებობისას, დელეგატის მიერ მატჩის გადადებაზე ან შეწყვეტაზე უარის თქმის შემთხვევაში, სადისციპლინო კომიტეტი იმსჯელებს დელეგატის ქმედებასთან დაკავშირებით და განსაზღვრავს სანქციის სახეს ყოველი კონკრეტული შემთხვევის გათვალისწინებით.

მუხლი 45. მატჩის ნაადრევად დასრულება

1. მსაჯის მიერ, შფა-ს ორგანიზებული სამოყვარულო საფეხბურთო ჩემპიონატის დებულებით დადგენილი მატჩის სათამაშო დროის თვითნებური შემცირება და სამოყვარულო საფეხბურთო მატჩის ნაადრევად დასრულება, ისჯება ჯარიმით 100 (ასი) ლარით.

2. მსაჯის იძულება ან წაქეზება ფეხბურთელის ან ოფიციალური წარმომადგენლის მიერ მატჩის ნაადრევად დასრულების მიზნით, ისჯება ამ პირის დისკვალიფიკაციით 3 (სამი) მატჩამდე ვადით და დამრღვევი ფეხბურთელის ან წარმომადგენელის გუნდს დაეკისრება ფულადი სანქცია 100 (ასი) ლარის ოდენობით.

3. ამ მუხლის 1-ლი ნაწილით განსაზღვრული ქმედების განმეორებით ჩადენის შემთხვევაში, მსაჯს აეკრძალება შფა-ს მიერ ორგანიზებულ შესაბამის სამოყვარულო საფეხბურთო ჩემპიონატში მსაჯობა გარკვეული დროით, რომლის ვადას განსაზღვრავს შფა-ს სადისციპლინო კომიტეტი.

მუხლი 46. უარი მატჩის გაგრძელებაზე

1. შფა-ს მიერ ორგანიზებულ სამოყვარულო საფეხბურთო ჩემპიონატის მატჩის მიმდინარეობისას, მატჩის გაგრძელებაზე უარის ან მინდვრიდან გუნდის/კლუბის თვითნებური (მსაჯის ნებართვის გარეშე) გასვლის შემთხვევაში, გუნდს/კლუბს ჩაეთვლება წაგება 0-5 და დაეკისრება სანქცია 300 (სამასი) ლარის ოდენობით. იგივე ქმედების განმეორების შემთხვევაში გუნდი/კლუბი მოიხსნება ჩემპიონატიდან.

2. ფეხბურთელს, ამ მუხლის 1-ლი ნაწილით განსაზღვრული ქმედების განხორციელების შემთხვევაში, მიეცემა დისკვალიფიკაცია 3 მატჩამდე ოდენობით და გაფრთხილება. იგივე ქმედების განმეორების შემთხვევაში ფეხბურთელი მოიხსნება ჩემპიონატიდან.

3. მსაჯს, ამ მუხლის 1-ლი ნაწილით განსაზღვრული ქმედების გონივრული საფუძვლის გარეშე განხორციელების შემთხვევაში, აეკრძალება მსაჯობა შფა-ს მიერ ორგანიზებულ შესაბამის სამოყვარულო საფეხბურთო ჩემპიონატში და დაუკავდება კუთვნილი ჰონორარიდან 300 (სამასი) ლარი .

4. ამ მუხლის მე-3 ნაწილით განსაზღვრული შედეგის დადგომისას, სამოყვარულო საფეხბურთო ჩემპიონატის მატჩი შეწყდება განსაზღვრული ვადით, რომლის ჩატარების დროს და ადგილს განსაზღვრავს შფა-ს საშეჯიბრო კომიტეტი. განახლებული მატჩი გრძელდება იგივე ანგარიშით და სათამაშო დროდ განისაზღვრება შეწყვეტილი მატჩის შეწყვეტიდან მატჩის დასრულებამდე არსებული დრო.

მუხლი 47. მოწევა ან ალკოჰოლური საშუალებების გამოყენება ტექნიკურ ზონაში

1. ფეხბურთელის, ოფიციალური წარმომადგენლის, მსაჯის ან/და მატჩის დელეგატის მიერ მოწევა ან ალკოჰოლური საშუალებების გამოყენება ტექნიკურ ზონაში, ისჯება ჯარიმით 50 (ორმოცდაათი) ლარის ოდენობით.

მუხლი 48. მატჩის მსვლელობაში ჩარევა

ფეხბურთელის, რომელიც არ იმყოფება მინდორზე მატჩის განაცხადში არყოფნის ან დისკვალიფიკაციის გამო ან გუნდის ოფიციალური წარმომადგენლის ან გულშემატკივრის მიერ განზრახ მატჩის მსვლელობაში ჩარევის შემთხვევაში, გუნდი/კლუბი ისჯება მოპოვებული ქულების ჩამოკლებით (არანაკლებ 3 და არაუმეტეს 9 ქულა) ან/და ტექნიკური მარცხით რომლის სახესაც განსაზღვრავს შფა-ს სადისციპლინო კომიტეტი და ასევე ფულადი ჯარიმით 300 ლარის ოდენობით.

მუხლი 49. არასპორტული საქციელი

1. არასპორტული საქციელი ფეხბურთელების, გუნდის ოფიციალური წარმომადგენლის ან/და გულშემატკივრის მიერ მატჩამდე, მატჩისას და მატჩის შემდეგ, რომელიც არ განეკუთვნება წინამდებარე კოდექსის და შფა-ს მიერ ორგანიზებული სამოყვარულო საფეხბურთო ჩემპიონატების დებულებების დარღვევებს ისჯება სანქციით, რომელსაც განსაზღვრავს სადისციპლინო კომიტეტი, ხოლო სანქციის სახით ფულადი ჯარიმის დაკისრების შემთხვევაში სადისციპლინო კომიტეტი განსაზღვრავს ჯარიმის ოდენობას არაუმეტეს 500 ლარისა.

2. სიტყვიერი ან/და ფიზიკური შეურაცხყოფა, ასევე ბილწსიტყვაობა ფეხბურთელის ან ოფიციალური წარმომადგენლის მიერ მატჩამდე, მატჩის მიმდინარეობისას ან მატჩის შემდეგ, მიმართული საკუთარი თავის, სამოყვარულო საფეხბურთო ჩემპიონატის მატჩის მსაჯების, მეტოქე ან საკუთარი გუნდის ფეხბურთელების ან/და ჩემპიონატის ორგანიზატორების მიმართ, ისჯება დამრღვევი პირის მოკვეთით ჩემპიონატიდან და გუნდისთვის/კლუბისთვის მოპოვებული ქულების ჩამოკლებით ან/და ფულადი სანქციის დაკისრებით 300–დან 500 ლარამდე, რომლის ოდენობას განსაზღვრავს შფა- ს სადისციპლინო კომიტეტი.

2.1 ამ მუხლის მე-2 პუნქტით გათვალისწინებული ქმედების დროს სადისციპლინო კომიტეტი უფლემამოსილია გამოიყენოს რამოდენიმე სანქცია ან ერთი კონკრეტული, რომელიც პროპორციულად მიაჩნია დარღვევის ხასიათიდან გამომდინარე.

3. სიტყვიერი ან/და ფიზიკური შეურაცხყოფა გულშემატკივრების მიერ მატჩამდე, მატჩის მიმდინარეობისას ან მატჩის შემდეგ, მიმართული სამოყვარულო საფეხბურთო ჩემპიონატის მატჩის მსაჯების, მეტოქე გუნდის ფეხბურთელების ან/და ჩემპიონატის ორგანიზატორების მიმართ, ისჯება გუნდისთვის მოპოვებული ქულების ჩამოკლებით ან/და ფულადი სანქციი 300 ლარის ოდენობით. ამ მუხლით განსაზღვრული ქმედების განმეორებით ჩადენის შემთხვევაში, გუნდი/კლუბი მოიხსნება ჩემპიონატიდან.

4. მაპროვოცირებელი ქმედება ან/და დამამცირებელი საუბარი ფეხბურთელის ან ოფიციალური წარმომადგენლის მიერ მატჩამდე, მატჩის მიმდინარეობისას ან მატჩის შემდეგ, სამოყვარულო ჩემპიონატის მატჩის მსაჯების, მეტოქე ან საკუთარი გუნდის ფეხბურთელების ან/და ჩემპიონატის ორგანიზატორების მიმართ ისჯება დამრღვევის გუნდისათვის ფულადი ჯარიმის დაკისრებით 300 ლარის ოდენობით, ასევე სადისციპლინო კომიტეტი იმსჯელებს დამრღვევი პირისათვის დისკვალიფიკაციის ოდენობის განსაზღვრაზე ან/და ჩემპიონატიდან მოკვეთის თაობაზე.

5. იმ შემთხვევაში თუ გუნდი/კლუბი არ გადაიხდის დაკისრებულ ჯარიმას ან არ აღასრულებს დაკისრებულ სანქციას გუნდი/კლუბი მოიხსნება გათამაშებიდან და ვერცერთი ფეხბურთელი, რომელიც ირიცხებოდა ამ გუნდი/კლუბის შემადგენლობაში მომდევნო 12 თვის განმავლობაში ვერ შეძლებს შფა–ს ეგიდით გამართულ ჩემპიონატებში მონაწილეობის მიღებას.

მუხლი 50. პროფესიონალი ფეხბურთელის განაცხადში ყოფნის დაუშვებლობა

1. შფა-ს მიერ ორგანიზებულ საფეხბურთო ჩემპიონატში მონაწილე გუნდის/კლუბში განაცხადში პროფესიონალი ფეხბურთელის ყოფნის შემთხვევაში, გუნდი დაჯარიმდება ფულადი ჯარიმით 300 (სამასი) ლარის ოდენობით და პროფესიონალი ფეხბურთელი მოიხსნება ჩემპიონატიდან.

2. ყველა იმ მატჩის შედეგი, რომელშიც პროფესიონალმა ფეხბურთელმა მიიღო მონაწილეობა, გაუქმდება და გუნდს ჩაეთვლება წაგება 0-5.

3. თუ გუნდის/კლუბის მიერ ორგანიზებული საფეხბურთო ჩემპიონატის მსვლელობისას, გუნდის/კლუბის განაცხადში მყოფი ფეხბურთელი ჩაირიცხება საქართველოს ეროვნული - 1, ეროვნული -2, რანგით მე-3 ლიგაში, რანგით მე-4, რანგით მე-5 და ფუტსალის უმაღლეს და მეორე ლიგაში მოასპარეზე გუნდში (ფუტსალის მოთამაშეებზე მხედველობაში მიიღება დებულებით გათვალისწინებული საგამონაკლისო შემთხვევა), გუნდის ოფიციალური წარმომადგენელი ვალდებულია ამის შესახებ დაუყოვნებლივ აცნობოს ჩემპიონატის ორგანიზატორს წერილობითი ფორმით.

4. ამ მუხლის მე-3 ნაწილით გათვალისწინებული შედეგის დადგომისას, ფეხბურთელს აეკრძალება შფა–ს მიერ ორგანიზებულ საფეხბურთო ჩემპიონატებში მონაწილეობის მიღება, ხოლო გუნდს მიეცემა შესაძლებლობა ჩაანაცვლოს პროფესიონალი ფეხბურთელი სხვა ფეხბურთელით.

5. თუ, ამ მუხლის მე-3 ნაწილით გათვალისწინებული შედეგის დადგომის მიუხედავად გუნდის ოფიციალურმა წარმომადგენელმა არ აცნობა ორგანიზატორს ამ ფაქტის შესახებ და ფეხბურთელი აგრძელებს შფა-ს მიერ ორგანიზებულ სამოყვარულო საფეხბურთო ჩემპიონატში მონაწილეობის მიღებას, სადისციპლინო კომიტეტის გადაწყვეტილების საფუძველზე გუნდი/კლუბი ჯარიმდება 300 (სამასი) ლარით, ფეხბურთელი მოიხსნება ჩემპიონატიდან, ხოლო ყველა იმ მატჩის შედეგი, რომელშიც პროფესიონალმა ფეხბურთელმა მიიღო მონაწილეობა, გაუქმდება და გუნდს ჩაეთვლება წაგება 0-5.

მუხლი 51. პასუხისმგებლობა მაყურებელთა ქცევაზე

1. მაყურებელთა ქცევაზე პასუხისმგებელია ნებისმიერი კლუბი/გუნდი, რომელსაც დაუდგინდა მისადმი იმ პირების კუთვნილება, რომლებმაც განახორციელეს სადისციპლინო დარღვევა ასეთ ვითარებაში სადისციპლინო კომიტეტი იმსჯელებს სანქციის სახეზე. იმ შემთხვევაში, თუ ასეთი პირების რომელიმე გუნდის მიმართ კუთვნილება ვერ დგინდება, არცერთ კლუბს/გუნდს არ დაეკისრება სადისციპლინო სანქცია.

2. იმ შემთხვევაში, თუ სტადიონის უსაფრთხოებას უზრუნველყოფს შფა და ასეთ სტადიონზე ნეიტრალური გულშემატკივარი იწვევს მასობრივ არეულობას ან/და არღვევს ამ კოდექსით განსაზღვრულ წესებს, გუნდებს სადისციპლინო პასუხისმგებლობა არ დაეკისრებათ. ნეიტრალურად ითვლება გულშემატკივარი, რომლის კუთვნილება არცერთი გუნდის მიმართ არ დასტურდება.

მუხლი 52. მატჩზე გამოუცხადებლობა საპატიო მიზეზით

1. გუნდის/კლუბის ან/და მსაჯის გამოუცხადებლობა მატჩზე საპატიო მიზეზით არ ითვლება ამ კოდექსის დარღვევად და პირს სანქცია არ დაეკისრება.

2. საპატიო მიზეზად შეიძლება ჩაითვალოს ფორს-მაჟორული მდგომარეობა, ავადმყოფობა ან/და სხვა დაუძლეველი ძალა, რომელსაც სადისციპლინო ორგანო მიიჩნევს საპატიო მიზეზად.

3. სავალდებულოა საპატიო მიზეზის ქონა დადასტურებული იყოს მტკიცებულებით. წინააღმდეგ შემთხვევაში ასეთი მიზეზი საპატიოდ ვერ ჩაითვლება

მუხლი 53. მატჩის დროებით შეწყვეტა ან/და ჩაშლა

1. გუნდის ფეხბურთელების და/ან კლუბის ოფიციალური წარმომადგენლების უდისციპლინო ქცევისთვის, რამაც გამოიწვია მატჩის დროებითი შეწყვეტა, დამრღვევი გუნდი – ისჯება ჯარიმით 300 ლარის ოდენობით.

2. გუნდის ფეხბურთელების და/ან კლუბის ოფიციალური წარმომადგენლების უდისციპლინო ქცევისთვის, რამაც გამოიწვია მატჩის ჩაშლა, დამრღვევ გუნდს ეთვლება ტექნიკური მარცხი (ანგარიშით 0-5) და ჯარიმდება 400 ლარის ოდენობით.

3. ორივე გუნდის ფეხბურთელების და/ან კლუბის ოფიციალური წარმომადგენლების უდისციპლინო ქცევისთვის, რამაც გამოიწვია მატჩის ჩაშლა, ორივე გუნდს ეთვლება ტექნიკური მარცხი (ანგარიშით 0-5) და ორივე გუნდი ჯარიმდება 400 ლარის ოდენობით.

4. მატჩის მსვლელობაში იმ პირების ჩარევა, რომლებიც არ არიან ფეხბურთელები და კლუბის ოფიციალური წარმომადგენლები, რამაც გამოიწვია მასიური უწესრიგობა, რის გამოც დროებით შეწყდა მატჩი, დამრღვევი გუნდი ისჯება ჯარიმით 300 ლარის ოდენობით.

5. მატჩის მსვლელობაში იმ პირების ჩარევა, რომლებიც არ არიან ფეხბურთელები და კლუბის ოფიციალური წარმომადგენლები, რამაც გამოიწვია მასიური უწესრიგობა, რის გამოც ჩაიშალა მატჩი, დამრღვევი გუნდი ისჯება ტექნიკური მარცხის მინიჭებით (ანგარიშით 0-5) და ჯარიმით 300 ლარის ოდენობით. ამასთანავე, დამრღვევს გუნდს შესაძლოა დაეკისროს 3-დან 5 მატჩამდე მაყურებლის გარეშე ჩატარება.

მუხლი 54. დისკრიმინაცია და რასიზმი

1. ფეხბურთელის ან გუნდის ოფიციალური წარმომადგენლების მიერ სხვა პირის შეურაცხყოფა რასობრივი კუთვნილების, კანის ფერის, ენის, რელიგიის, წარმომავლობის ან/და სხვა ნიშნით – ისჯება 4-დან 8 მატჩამდე დისკვალიფიკაციით და გუნდის ჯარიმით 300 ლარის ოდენობით.

2. მაყურებლის/გულშემატკივრის მიერ რასობრივი კუთვნილების, კანის ფერის, ენის, რელიგიის, წარმომავლობის ან/და სხვა ნიშნით რომელიმე პირის შეურაცხყოფის შემთხვევაში, კლუბი/გუნდი – ისჯება ჯარიმით 300 ლარის ოდენობით ან/და მაყურებლის გარეშე 1-დან 3 მატჩამდე ჩატარებით ან/და 3 ქულის ჩამოკლებით ლიგის სისტემით ჩატარებულ ჩემპიონატში დაგროვილი ქულების საერთო რაოდენობიდან.

თავი VI. გარდამავალი დებულებები

მუხლი 55. ოფიციალური ენა

წინამდებარე კოდექსი მიღებულია ქართულ ენაზე და კოდექსით განსაზღვრული ყველა საპროცესო მოქმედება ხორციელდება ქართულ ენაზე.

მუხლი 56. გენდერი და რიცხვი

წესები და რეგულაციები, რომლებიც ეხება ფიზიკურ პირებს ვრცელდება ორივე გენდერზე. მხოლობით რიცხვში გადმოცემული ნებისმიერი წესი ვრცელდება მრავლობით რიცხვზეც და პირიქით.

მუხლი 57. კოდექსის ამოქმედება

სადისციპლინო კოდექსი ძალაში შედის 2023 წლის 1 იანვრიდან.

დამტკიცებულია 7x7ფეხბურთის ასოციაციის გამგეობის მიერ