7x7 ფეხბურთის ჩემპიონატების: თბილისის „betlive Master League“-ის, თბილისის „betlive Master League 2“-ის, თბილისის „ betlive Master League 3“-ის, რეგიონალური „betlive Master League“-ის და “MASTER CUP“-ის 2024 წლის სეზონის დებულება

1.მიზანი

1.1 „betlive Master League“, (შემდგომში ჩემპიონატები) მიზნად ისახავს:

1.2.1. ფეხბურთის მასობრიობის გაზრდას:

1.2.2. საფეხბურთო ლიგების ჩამოყალიბებას;

1.2.3. 7x7 ფეხბურთის შემდგომ განვითარებას და პოპულარიზაციას

1.2.4. ჯანსაღი და სპორტული ცხოვრების წესის დამკვიდრებას;

1.2.5. სისტემატური, ყოველწლიური ნახევრად პროფესიონალური, პროფესიონალური და სამოყვარულო საფეხბურთო ლიგების ჩამოყალიბებას;

1.2.6. ნიჭიერი ახალგაზრდა ფეხბურთელების აღმოჩენას;

1.2.7. 7x7 ფეხბურთის შესაბამისი მოედნების მოძიებას, ინსპექტირებას, აღდგენას და ამოქმედებას;

1.2.8. ვეტერანი ფეხბურთელების დაბრუნებას და ჩართვას ფეხბურთში;

1.2.9. დამწყები მწვრთნელების განვითარების ხელშეწყობას

1.2.10. დამწყებ მსაჯთა (რეგიონებში) განვითარების ხელშეწყობას

1.2.11. მსაჯთა აკადემიის კურსანტების ჩართულობას და განვითარებას.

1.2.12. საქართველოს ყველა რეგიონში მზარდი საფეხბურთო ლიგების ჩამოყალიბებას და განვითარებას.

1.2.13. ფეხბურთში რეგიონალური ნაკრებების ფორმირებას.

1.2.14. ფეხბურთში ეროვნული ნაკრების ფორმირებას და საერთაშორისო ასპარეზზე მონაწილეობის მიღებას.

2. მოქმედების სფერო

2.1 .დებულების მოქმედება ვრცელდება შფა-ს ეგიდით ორგანიზებულ ჩემპიონატის ეტაპებზე.

2.2 .წინამდებარე დებულება ვრცელდება შემდეგ პირებზე:

2.2.1 კლუბებზე / გუნდებზე;

2.2.2 ოფიციალურ წარმომადგენლებზე;

2.2.3 ფეხბურთელებზე;

2.2.4 მატჩის ოფიციალურ პირებზე;

2.2.5 გულშემატკივრებზე / მაყურებლებზე;

2.2.6 შფა-ის მიერ ავტორიზებულ პირებზე, კერძოდ, იმ პირებზე, რომლებიც ავტორიზებულები, ლიცენზირებულები ან/და დროებით დაქირავებულნი არიან შფა-ს მიერ.

3. ჩემპიონატის ორგანიზატორი

3.1 „betlive Master League“-ს, და “MASTER CUP“-ს ხელმძღვანელობს და ორგანიზებას უწევს 7X7 ფეხბურთის ასოციაცია (შემდგომში - შფა)

3.2 თბილისის "betlive Master League“ -ის, „betlive Master League 2“-ის, „betlive Master League 3“-ის და თბილისის მერიის თასის მხარდამჭერია ქ. თბილისის მუნიციპალიტეტის მერია, ხოლო მუნიციპალური და რეგიონალური „betlive Master League“ -ის და „MASTER CUP”-ს ბეთლაივი და საქართველოს ფეხბურთის ფედერაცია.

3.3 თბილისის "betlive Master League“ -ის, „betlive Master League 2“-ის, „betlive Master League 3“-ის ჩემპიონატებში მონაწილეობენ თბილისის მუნიციპალიტეტში რეგისტრირებული საფეხბურთო გუნდები, რომლებიც ემორჩილებიან ამ დებულებითა და IFAB-ის (ფეხბურთის საერთაშორისო ასოციაციების საბჭო) მიერ დადგენილ ზოგად თამაშის წესებს და ექვემდებარებიან ამ დებულებას, სატრანსფერო რეგულაციებს, შფა-ს სადისციპლინო კოდექსსა და გადაწყვეტილებებს, ითვალისწინებენ სამართლიანი თამაშის (FAIR PLAY) წესებს.

3.4 თბილისის "betlive Master League“ -ის, „betlive Master League 2“-ის, „betlive Master League 3“-ის, მუნიციპალური და რეგიონალური „betlive Master League“ -ის და „MASTER CUP”-ს კალენდარი წარმოადგენს შფა-ს საკუთრებას. შფა-ს შეუძლია არსებული კალენდარის გამოყენება სარეკლამო, კომერციული და სხვა მიზნით. მატჩების განრიგი და დრო განისაზღვრება შფა-ს მიერ დამტკიცებული კალენდრის მიხედვით.

3.5 საფეხბურთო მოედნებზე, სადაც ჩატარდება "betlive Master League“ -ის, „betlive Master League 2“-ის, „betlive Master League 3“-ის და „MASTER CUP”-ის მატჩები სარეკლამო დაფის განთავსება შესაძლებელია მხოლოდ შფა-ის თანხმობით და სარეკლამო დაფის განთავსებით მატერიალურ სარგებელს იღებს მხოლოდ შფა. სარეკლამო მომსახურების საფასურს ყოველ კონკრეტულ შემთხვევაში განსაზღვრავს შფა.

4. ჩემპიონატში მონაწილეობის უფლება

4.1. თბილისის "betlive Master League“ -ის, „betlive Master League 2“-ის, „betlive Master League 3“-ის ჩემპიონატებში მონაწილეობის უფლება აქვთ თბილისის მუნიციპალიტეტის ტერიტორიაზე რეგისტრირებულ სამოყვარულო საფეხბურთო გუნდებს.

4.1.1 ჩემპიონატებში მონაწილეობის უფლება აქვს ნებისმიერ გუნდს, რომლის შემადგენლობაც დაკომპლექტებულია წინამდებარე დებულების მოთხოვნათა შესაბამისად.

4.2. ჩემპიონატში მონაწილეობის მსურველმა გუნდებმა შფა-ს მიერ დადგენილ ვადებში უნდა წარმოადგინონ შემდეგი სახის დოკუმენტაცია:

4.2.1. თბილისის ჩემპიონატებში მონაწილე გუნდებმა უნდა წარმოადგინონ:

• ამონაწერი მეწარმეთა და არასამეწარმეო პირების რეესტრიდან (გუნდი უნდა იყოს რეგისტრირებული იურიდიულ პირად)

• პირველადი განაცხადის შევსებული ფორმა ქაღალდისა და ელექტრონული ვერსია (გუნდის სახელის და სათამაშო ნომრების მითითებით) - ამასთან გუნდს აუცილებლად უნდა ყავდეს პასუხისმგებელი საკონტაქტო პირი/წარმომადგენელი, რომელიც იმავდროულად არ შეიძლება იყოს მოთამაშე.

• გუნდის ან/და მისი წარმომადგენლის საბანკო რეკვიზიტი (ამონაწერი)

• ორი განსხვავებული ფერის ფორმის ნიმუში, რომელიც ბრენდირებულია ასოციაციის დადგენილი სტანდარტის შესაბამისად (შორტი, მაისური, გეტრი)

• გუნდის ლოგო (რომელიც გაგზავნილი უნდა იყოს ასოციაციის ელ ფოსტაზე: [email protected] )

• საწევროს გადახდის ქვითარი

• გუნდს უფლება აქვს წარმოადგინოს განახლებული განაცხადი არაუგვიანეს ჩემპიონატის დაწყებამდე 10 დღით ადრე.

4.2.2. რეგიონალური (აღმოსავლეთი და დასავლეთი) „betlive Master League“-ს მონაწილე გუნდებმა უნდა წარმოადგინონ:

• განაცხადის შევსებული ფორმა ქაღალდისა და ელექტრონული ვერსია (გუნდის სახელის და სათამაშო ნომრების მითითებით) - ამასთან გუნდს აუცილებლად უნდა ყავდეს პასუხისმგებელი საკონტაქტო პირი/წარმომადგენელი, რომელიც იმავდროულად არ შეიძლება იყოს მოთამაშე.

• გუნდის ან/და მისი წარმომადგენლის საბანკო რეკვიზიტი (ამონაწერი)

• ორი განსხვავებული ფერის ფორმის ნიმუში, რომელიც ბრენდირებულია ასოციაციის დადგენილი სტანდარტის შესაბამისად (შორტი, მაისური, გეტრი)

• გუნდის ლოგო (რომელიც გაგზავნილი უნდა იყოს ასოციაციის ელ ფოსტაზე: [email protected] )

• საწევროს გადახდის ქვითარი

• გუნდს უფლება აქვს წარმოადგინოს განახლებული განაცხადი არაუგვიანეს ჩემპიონატის დაწყებამდე 10 დღით ადრე.

4.2.3. მუნიციპალურ ლიგაში მოთამაშე გუნდებმა უნდა წარმოადგინონ:

• განაცხადის შევსებული ფორმა ქაღალდისა და ელექტრონული ვერსია (გუნდის სახელის და სათამაშო ნომრების მითითებით) - ამასთან გუნდს აუცილებლად უნდა ყავდეს პასუხისმგებელი საკონტაქტო პირი/წარმომადგენელი, რომელიც იმავდროულად არ შეიძლება იყოს მოთამაშე.

• გუნდის ლოგო (რომელიც გაგზავნილი უნდა იყოს ასოციაციის ელ ფოსტაზე: [email protected] )

• მუნიციპალურ „betlive Master League“-ში მონაწილეობა არის უსასყიდლო.

4.3. ჩემპიონატში მონაწილე გუნდის განაცხადში შეყვანილი ფეხბურთელების ასაკი განისაზღვრება 18 წლიდან.

4.4. რეგიონალურ თუ მუნიციპალურ ჩემპიონატებში მონაწილე გუნდის განაცხადში უნდა იყოს არანაკლებ 14 და არაუმეტეს 20 მოთამაშე, მათ შორის 2 მეკარე აუცილებლად. მონაწილე გუნდებს უფლება არ აქვთ განაცხადში შეიყვანონ პროფესიონალი ფეხბურთელი. პროფესიონალად ითვლება ფეხბურთელი, რომელიც ჩემპიონატის მონაწილე გუნდების რეგისტრაციის დასრულებისას ირიცხება საქართველოს ეროვნული - 1, ეროვნული - 2, რანგით მე-3 ლიგაში, რანგით მე-4 ლიგაში, რანგით მე-5 ლიგაში, ჭაბუკთა ლიგაში მოასპარეზე გუნდში ან მონაწილეობას იღებს რომელიმე ასაკობრივ ჩემპიონატში, ასევე ფუტსალის უმაღლეს ლიგაში,ფუტსალის მეორე და მესამე ლიგაში მოასპარეზე გუნდში. ამასთან მოთამაშე მწვრთვნელის არსებობის შემთხვევაში, გუნდი ვალდებულია შესაბამისი პირი მიუთითოს ფეხბურთელთა გრაფაშიც და მწრთვნელის გრაფაშიც.

4.4.1 იმ შემთხვევაში, თუ მონაწილე გუნდების რეგისტრაციის დასრულების შემდეგ, ამ ჩემპიონატის მონაწილე რომელიმე გუნდის განაცხადში შეყვანილი ფეხბურთელი ჩაირიცხება 4.4. პუნქტში ჩამოთვლილ რომელიმე ლიგის გუნდში, ჩემპიონატში მონაწილე გუნდმა ამის შესახებ დაუყოვნებლივ წერილობით უნდა აცნობოს შფა-ს.

4.5. თბილისის "betlive Master League“ -ის, „betlive Master League 2“-ის, „betlive Master League 3“-ის ჩემპიონატებში მონაწილე ნებისმიერ ფეხბურთელს, რომელიც ირიცხება ერთი გუნდის შემადგენლობაში, უფლება არა აქვს იასპარეზოს სხვა გუნდის შემადგენლობაში, შფა-ს სატრანსფერო დებულების გვერდის ავლით. შფა-ს სატრანსფერო დებულების ნორმების დარღვევად ჩაითვლება, ამავე დებულებით განსაზღვრული სატრანსფერო პერიოდის დაუცველად, ჩემპიონატში მონაწილე ფეხბურთელის ერთი გუნდიდან ამავე ჩემპიონატში მონაწილე მეორე გუნდში გადასვლა ან/და ორ ან რამდენიმე გუნდში ასპარეზობა. სატრასფერო პერიოდში ფეხბურთელის ახალ გუნდში დარეგისტრირებამდე, ახალმა გუნდმა შფა-ს უნდა წარუდგინოს გათავისუფლების ოფიციალური წერილი ამ ფეხბურთელის ყოფილი გუნდიდან.

4.6 გუნდის განაცხადში ყოფილი პროფესიონალი ფეხბურთელის, როგორც თავისუფალი ფეხბურთელის დამატება შესაძლებელია შემდეგი პირობების დაცვით.

• ფუტსალის რომელიმე ლიგაში მოთამაშე ფეხბურთელი, რომელიც განთავისუფლებულია გუნდიდან 2024 წლის 1 იანვრის შემდეგ, არ აქვს უფლება დარეგისტრირდეს გუნდის განაცხადში, როგორც ახალი ფეხბურთელი.

• საქართველოს ეროვნული - 1, ეროვნული - 2, რანგით მე-3 ლიგაში, რანგით მე-4 ლიგაში, რანგით მე-5 ლიგაში, ჭაბუკთა ლიგაში ან რომელიმე ასაკობრივ ჩემპიონატში მოასპარეზე ყოფილი პროფესიონალი ფეხბურთელის გუნდის განაცხადში შეიძლება დარეგისტრირდეს თუ მისი ოფიციალურად განთავისუფლება მოხდა 2023 წლის 31 დეკემბრამდე ან თუ განთავისუფლებულია მიმდინარე 2024 წლის სეზონში და მისი ოფიციალურად განთავისუფლებიდან გასულია 6 თვე.

4.7. შფა-ში გუნდის მიერ შეტანილი განაცხადის შეცვლა შესაძლებელია მხოლოდ შფა-ს სატრანსფერო ნორმებით განსაზღვრულ ვადებში და ფორმით.

5. თბილისის ჩემპიონატის ჩატარების სისტემა

5.1. თბილისის “ betlive Master League“ -ის, „betlive Master League 2“-ის, „betlive Master League 3“-ის ჩემპიონატების ჩატარდება ლიგისა და ფლეიოფის პრინციპით შემდეგი წესების დაცვით.

5.2 თბილისის betlive Master League (რანგით უმაღლესი ლიგა) გაიმართება ლიგის და საჩემპიონო ფლეიოფის პრინციპით, მონაწილე 20 გუნდი ლიგის პრინციპით ითამაშებს 19 ტურს ყველა მოწინააღმდეგესთან. ლიგის დასრულების შემდგომ პირველ, მეორე, მესამე და მეოთხე ადგილზე გასული გუნდები გადაერთვებიან საჩემპიონო ფლეიოფში, რომელიც გაიმართება შემდეგი პრინციპით:

1. ჩემპიონატში 1 ადგილზე გასული გუნდი დაუპირისპირდება ჩემპიონატში მე-4 ადგილზე გასულ გუნდს.

2. ჩემპიონატში მე-2 ადგილზე გასული გუნდი დაუპირისპირდება ჩემპიონატში მე-3 ადგილზე გასულ გუნდს.

საჩემპიონო ფლეიოფის მატჩები გაიმართება 2 მოგებამდე - სერიის რომელიმე მატჩის ფრედ დასრულების შემთხვევაში გაიმართება ბულიტების სერია და გამოვლინდება კონკრეტული მატჩის გამარჯვებული.

ფინალური მატჩი - გაიმართება 1 თამაში.

ჩემპიონატიდან ავტომატურად გავარდებიან და 2025 წლის სეზონში “betlive Master League” -ში (უმაღლეს ლიგა) ასპარეზობის უფლება არ ექნებათ ჩემპიონატში მე-17, მე-18, მე-19 და მე-20 ადგილზე გასულ გუნდებს - ისინი დაქვეითდებიან და 2025 წლის სეზონში ითამაშებენ “betlive Master League 2” -ში. თბილისის betlive Master League-ის გამარჯვებული გუნდი პირდაპირ მოხვდება კაჭრეთის ამბასადორში გასამართ MASTER CUP -ის ფინალურ რაუნდზე, ხოლო დანარჩენი 3 ნახევარფინალისტი გუნდი გადაერთვება MASTER CUP 2024-ის საფლეიოფო რაუნდზე

5.2.1 თბილისის “betlive Master League-2”-ში (რანგით მე-2 ლიგა) მონაწილეობას მიიღებს 20 სამოყვარულო საფეხბურთო გუნდი. გუნდები ლიგის და ფლეიოფის პრინციპით ითამაშებენ. მონაწილე გუნდები ითამაშებენ 19 ტურს და გამოავლენენ 4 გუნდს (1, მე-2, მე-3 და მე-4 ადგილოსნები) , რომლებიც ერთის მხრივ ავტომატურად დაწინაურდებიან უმაღლეს ლიგაში შემდეგი 2025 წლის სეზონისთვის და ასევე ითამაშებენ თბილისის betlive Master League 2-ის საჩემპიონო ფლეიოფში შემდეგი პრინციპით:

1. ჩემპიონატში 1 ადგილზე გასული გუნდი დაუპირისპირდება ჩემპიონატში მე-4 ადგილზე გასულ გუნდს.

2. ჩემპიონატში მე-2 ადგილზე გასული გუნდი დაუპირისპირდება ჩემპიონატში მე-3 ადგილზე გასულ გუნდს.

საჩემპიონო ფლეიოფის მატჩები გაიმართება 1 მოგებამდე - მატჩის ფრედ დასრულების შემთხვევაში გაიმართება ბულიტების სერია და გამოვლინდება მატჩის გამარჯვებული.

betlive Master League 2-ის გამარჯვებული გუნდი გადაერთვება MASTER CUP 2024-ის საფლეიოფო რაუნდზე. თბილისის betlive Master League 2-ში მე-17, მე-18, მე-19 და მე-20 ადგილზე გასული გუნდები- დაქვეითდებიან და 2025 წლის სეზონში ითამაშებენ “ betlive Master League 3” -ში

5.2.2 თბილისის betlive Master League 3 გაიმართება ლიგის და ფლეიოფის პრინციპით სამ ქვეჯგუფად. მონაწილე 3 გუნდი გადანაწილდება 3 (სამ) A,B და C ქვეჯგუფში 17-17 გუნდად. თითოეული ქვეჯგუფის გუნდი ითამაშებს ლიგის პრინციპით 17 ტურს და გამოავლენს ქვეჯგუფის გამარჯვებულს. ქვეჯგუფის პირველი ადგილოსანი გუნდები ავტომატურად მოიპოვებენ მე-2 ლიგის საგზურს და ნახევარფინალში დაელოდებიან მე-3 ლიგის საკვალიფიკაციო ფლეიოფის გამარჯვებულს, რომელშიც მონაწილეობას მიიღებენ ქვეჯგუფის მეორეადგილოსნები და 1 საუკეთესო მე-3 ადგილოსანი შემდეგი პრინციპით:

1. საუკეთესო მე-2 ადგილოსანი - საუკეთესო მე-3 ადგილოსანი

2. ქვეჯგუფის მე-2 ადგილოსანი - ქვეჯგუფის მე-2 ადგილოსანი

თამაშები გაიმართება 1 მოგებამდე

საკვალიფიკაციო ფლეიოფის გამარჯვებული მოიპოვებს მე-2 ლიგის საგზურს და betlive Master League 3 -ის საჩემპიონო ფლეიოფში ასპარეზობის უფლებას.

ნახევარფინალური დაპირისპირებები გაიმართება შემდეგი პრინციპით:

1.საუკეთესო პირველადგილოსანი - საკვალიფიკაციო პლეიოფის გამარჯვებული

1.ქვეჯგუფის პირველ ადგილოსანი - ქვეჯგუფის პირველადგილოსანი

თამაშები გაიმართება 1 მოგებამდე

ნახევარფინალური წყვილების გამარჯვებულები ითამაშებენ სუპერ ფინალს betlive Master League 3 -ის ჩემპიონის გამოსავლენად, ამასთან ქვეჯგუფების გამარჯვებული გუნდები ავტომატორად დაწინაურდებიან და 2025 წლის სეზონში იასპარეზებენ თბილისის “betlive Master League 2” -ში.

5.2.3 თბილისის მერიის თასის 2024 წლის გათამაშებაში მონაწილეობას მიიღებს თბილისის მასშტაბით სამივე ლიგაში რეგისტრირებული ჯამში 64 გუნდი, შემდეგი წესების დაცვით.

ჩემპიონატში აუცილებლად მიიღებს მონაწილეობას უმაღლესი და მეორე ლიგის 20-20 გუნდი და ამას დაემატება 24 გუნდი მე-3 ლიგიდან.

24 გუნდი დაკომპლექტდება შემდეგნაირად A,B და C ქვეჯგუფებში საწყისი 7 ტურის შემდეგ 1 დან მე-8 ადგილის ჩათვლით მყოფი გუნდები მოიპოვებენ თასის საგზურს.

1 რაუნდში - 1/32 ფინალი (32 მატჩი)

2 რაუნდი - 1/16 ფინალი (16 მატჩი)

3 რაუნდი -1/8 ფინალი (8 მატჩი)

4 რაუნდი -1/4- ფინალი (4 მატჩი)

5 რაუნდი -1/2- ფინალი (2 მატჩი)

6 რაუნდი - ფინალი (1 მატჩი)

თბილისის მერიის თასის გამარჯვებული გუნდი გადაერთვება MASTER CUP 2024-ის საფლეიოფო რაუნდზე.

5.3. თბილისის ჩემპიონატები დაიწყება 2024 წლის 31 მარტს და დასრულდება 2024 წლის 30 ნოემბერს.

5.3.1 თბილისის ჩემპიონატებში სარეგისტრაციო პერიოდი დაიწყება 2024 წლის 10 იანვარს და გაგრძელდება 2024 წლის 10 მარტამდე.

6. აღმოსავლეთის და დასავლეთის betlive Master League

6.1. აღმოსავლეთის betlive Master League-ში მონაწილეობას მიიღებს რეგისტრირებული გუნდები აღმოსავლეთ საქართველოს რეგიონებიდან (კახეთი, შიდა ქართლი, სამცხე-ჯავახეთი, ქვემო ქართლი, მცხეთა მთიანეთი)

6.1.2 აღმოსავლეთის betlive Master League გაიმართება ლიგისა და ფლეიოფის სისტემით, ჩემპიონატის კალენდარი და ჩატარების სისტემა გადაეცემათ მონაწილე გუნდებს ჩემპიონატის დაწყებამდე არაუგვიანეს 10 დღისა.

6.2. დასავლეთის betlive Master League-ში მონაწილეობას მიიღებს რეგისტრირებული გუნდები დასავლეთ საქართველოს რეგიონებიდან ( იმერეთი, გურია, აჭარა, სამეგრელო, რაჭა-ლეჩხუმი)

6.2.1 დასავლეთის betlive Master League გაიმართება ლიგისა და ფლეიოფის სისტემით, ჩემპიონატის კალენდარი და ჩატარების სისტემა გადაეცემათ მონაწილე გუნდებს ჩემპიონატის დაწყებამდე არაუგვიანეს 10 დღისა.

7. მუნიციპალური, რეგიონალური რაუნდები და საქართველოს MASTER CUP 2024

7.1 BETLIVE MASTER LEAGUE-ს მუნიციპალურ საკვალიფიკაციო გათამაშებაში

მონაწილეობას მიიღებს საქართველოს ყველა მუნიციპალიტეტში რეგისტრირებული გუნდები.

7.2 მუნიციპალური საკვალიფიკაციო რაუნდის მატჩები გაიმართება ოლიმპიური სისტემით და აღნიშნული ეტაპიის გამარჯვებულები გადაერთვებიან რეგიონალურ რაუნდზე სადაც ასევე ოლიმპიური პრინციპით გამოავლენენ რეგიონის ჩემპიონებს -რომლებიც კონფერენციის მიხედვით ითამაშებენ ფლეიოფს MASTER CUP-ის საკვალიფიკაციო რაუნდზე მოსახვედრად.

7.3 MASTER CUP-ი შედგება ორი ეტაპისგან

- საკვალიფიკაციო რაუნდი

- ამბასადორის ფინალური რაუნდი

7.3.1 MASTER CUP - ის საკვალიფიკაციო რაუნდში მონაწილეობას მიიღებს 16 გუნდი, რომლებიც გაითამაშებენ ფინალური რაუნდის 4 საგზურს

7.3.2. MASTER CUP - ის საკვალიფიკაციო რაუნდის მონაწილე 16 გუნდი დაკომპლექტება შემდეგნაირად.

1. თბილისის betlive Master League-ის (უმაღლესი ლიგა) ფინალისტი

2. თბილისის betlive Master League-ის (უმაღლესი ლიგა) ნახევარფინალისტი

3. თბილისის betlive Master League-ის (უმაღლესი ლიგა) ნახევარფინალისტი

4. თბილისის betlive Master League 2 ის ჩემპიონი

5. თბილისის betlive Master League 3 ის ჩემპიონი

6. თბილისის მერიის თასის გამარჯვებული

7. ვაილდ ქარდი

8. ვაილდ ქარდი

9. აღმოსავლეთ საქართველოს betlive Master League-ის ფინალისტი

10. აღმოსავლეთ საქართველოს betlive Master League-ის ნახევარფინალისტი

11. აღმოსავლეთ საქართველოს betlive Master League-ის ნახევარფინალისტი

12. დასავლეთ საქართველოს betlive Master League-ის ფინალისტი

13. დასავლეთ საქართველოს betlive Master League-ის ნახევარფინალისტი

14. დასავლეთ საქართველოს betlive Master League-ის ნახევარფინალისტი

15. დასავლეთ საქართველოს საკვალიფიკაციო მუნიციპალური და რეგიონალური რაუნდიდან გასული გუნდი.

16. აღმოსავლეთ საქართველოს საკვალიფიკაციო მუნიციპალური და რეგიონალური რაუნდიდან გასული გუნდი.

7.3.3 MASTER CUP - ის ამბასადორის ფინალური რაუნდის გათამაშებაში მონაწილეობას მიიღებს 8 გუნდი, რომლებიც კენჭისყრით დაუპირიპირდებიან ერთმანეთს. აღნიშნული 8 გუნდი დაკომპლექტდება შემდეგნაირად 1 ადგილი ავტომატურად ეკუთვნის ამბასოდორს (მასპინძელის კვოტა) ადგილს ავტომატურად დაიკავებენ თბილისის MASTER LEAGUE-ის (უმაღლესი ლიგა) 2024 წლის ჩემპიონი, აღმოსავლეთ საქართველოს betlive Master League-ის 2024 წლის სეზონის ჩემპიონი და დასავლეთ საქართველოს betlive Master League-ის 2024 წლის სეზონის ჩემპიონი, ხოლო დარჩენილი 4 ადგილი გათამაშდება 7.3.2 პუნქტის შესაბამისად.

შენიშვნა: იმ შემთხვევაში თუ „ამბასადორის“ საფეხბურთო გუნდი მოიპოვებს ფინალური რაუნდის საგზურს საკვალიფიკაციო რაუნდიდან, 1 დამატებითი საგზური გათამაშდება იმ 4 გუნდს შორის, რომლებიც დამარცხდებიან საკვალიფიკაციო რაუნდის ბოლო ეტაპზე.

8. ჩემპიონატის ჩატარების პირობები და წესები

8.1. ჩემპიონატის კალენდარი დგება შფა-ს მიერ ჩატარებული კენჭისყრის საფუძველზე.

8.2. ლიგაში მოასპარეზე ყველა გუნდი ვალდებულია ქონდეს ორი განსხვავებული ფორმა (მაისური, შორტი, გეტრი). ყველა მატჩში, რომლებიც გაიმართება თბილისის betlive Master League-ში, betlive Master League 2-ში, betlive Master League 3-ში, თბილისის მერიის თასზე და საქართველოს MASTER CUP-ზე გუნდები წარმოდგენილი უნდა იყვნენ განსხვავებული ეკიპირებით და არ შეიძლება ერთმანეთს ემთხვეოდეს მაისურის, შორტის და გეტრის ფერი. იმ შემთხვევაში თუ ფეხბურთელი სარგებლობს თერმო მაისურით, თერმო მაისურის ფერი უნდა ემთხვეოდეს კონკრეტულ მატჩში სათამაშო ფორმის (მაისურის) ფერს, ან უნდა იყოს თეთრი ან/და შავი, ყველა სხვა დანარჩენ შემთხვევაში ფეხბურთელი მოედანზე არ დაიშვება.

8.2.1 ყველა გუნდი ვალდებულია ყავდეს მწრთვნელი და ოფიციალური წარმომადგენელი. მწრთვნელი შესაძლოა იყოს პირი, რომელსაც აქვს შესაბამისი ლიცენზია ან/და გაკეთებული აქვს განაცხადი ლიცენზიის მოსაპოვებლად. გუნდს შესაძლოა ყავდეს მოთამაშე მწრთვნელი და ხოლო გუნდის ოფიციალური წარმომადგენელი არ შეიძლება იმავდროულად იყოს რეგისტრირებული სათამაშო განაცხადში, როგორც ფეხბურთელი.

8.3. გუნდის წარმომადგენელი ან/და მწრთვნელი ვალდებულია მატჩის დაწყებამდე 10 წუთით ადრე მატჩის დელეგატს წარუდგინოს კონკრეტული მატჩის განაცხადში შეყვანილი მოთამაშეები.

8.3.1. კონკრეტულ დაპირისპირებამდე მასპინძელის სტატუსით მოასპარეზე გუნდი ვალდებულია აირჩიოს სათამაშო ფორმის ფერი (შორტი, მაისური,გეტრი) და აცნობოს ლიგის დელეგატს არაუგვიანეს მატჩის გამართვამდე 2 დღისა, თუ მასპინძელის სტატუსით მოასპარეზე გუნდმა დააღღვია აღნიშნული ვალდებულება ფორმის არჩევის უპირატესობა გადადის ნომინალურ სტუმარზე.

8.4. თამაშის გასამართად თითოეული გუნდის ძირითად შემადგენლობაში უნდა იყოს 7 ფეხბურთელი მწრთვნელის გარეშე, ხოლო თუ აღნიშნული 7 ფეხბურთელიდან ერთი არის პირი რომელიც გაფორმებულია, როგორც მოთამაშე მწრთვნელი მაშინ გუნდს დამატებით უნდა ყავდეს წარმომადგენელი.

8.4.1 თუ ჩემპიონატის მატჩის დაწყების დროს გუნდის შემადგენლობაში არ არიან საკმარისი ფეხბურთელები 8.4 მუხლის შესაბამისად თამაში არ დაიწყება და გუნდს ჩაეთვლება ტექნიკური მარცხი ანგარიშით 0-5, ამასთან შფა-ს ლიგის ხელმძღვანელი დელეგატი იმსჯელებს გუნდისათვის გონივრული სანქციის დაკისრებაზე შფა-ს სადისციპლინო კოდექსის შესაბამისად. გაუთვალისწინებელ შემთხვევაში მატჩის დელეგატი უფლებამოსილია განსაზღვროს მოცდის დრო არაუმეტეს 15 (თხუთმეტი) წუთის ოდენობით.

8.5. თბილისის ჩემპიონატების მატჩებისას თუ გუნდების ძირითადი სათამაშო ფორმები მსგავსია, ნომინალური მასპინძელი 8.3.1 მუხლის წესების დაცვით ირჩევს სათამაშო ფორმის ფერს, ხოლო თუ ნომინალურ სტუმარ გუნდს არ გააჩნია მეორე სათამაშო ფორმა მას ჩაეთვლება ტექნიკური წაგება 5-0, ხოლო იმ შემთხვევაში თუ ფორმის არჩევის უპირატესობა გადავიდა ნომინალურ სტუმარ გუნდზე და მასპინძელის სტატუსით მოასპარეზე გუნდს კონკრეტულ თამაშზე არ გააჩნია მეორე სათამაშო ფორმა, ნომინალურ მასპინძელს ჩაეთვლება ტექნიკური მარცხი ანგარიშით 0-5. იმავე პრობლემის მუნიციპალურ და რეგიონულ ეტაპზე წარმოშობის შემთხვევაში საკითხი, თუ რომელი გუნდი გამოიყენებს ფერის განმასხვავებელ გადასაცმელს, გადაწყდება კენჭისყრით.

8.6. ჩემპიონატის მატჩებში არ არის განსაზღვრული ცვლილების განხორციელების რაოდენობის ლიმიტი. შეცვლილი მოთამაშის მოედანზე დაბრუნება შესაძლებელია. მატჩის მიმდინარეობისას გუნდმა ცვლილება უნდა განახორციელოს დელეგატის მეთვალყურეობის ქვეშ. თითოეულ გუნდ ცვლილებების განსახორციელებლად ეძლევა ტერიტორია სათადარიგო სკამიდან მოედნის ცენტრამდე, ცვლილების განხორციელების პროცესში მოედანზე შემსვლელმა ფეხბურთელმა ხელიდან ხელში უნდა გადასცეს გამომსვლელ ფეხბურთელს ფერის განმასხვავებელი მაისური.

8.7. სათადარიგო მოთამაშეთა მოთელვა უნდა ხდებოდეს დელეგატის ან/და მსაჯის მიერ მითითებულ ადგილზე. სათადარიგო მოთამაშე, გუნდის წარმომადგენელი და მწრთვნელი ვალდებულნი არიან დაემორჩილონ, მატჩის დელეგატის, ჩემპიონატის კოორდინატორის ან/და ასოციაციის წარმომადგენლების მითითებებს.

8.8. თამაშის დროს, სათამაშო კარის უკან, შესაბამის ადგილას დგომის უფლება აქვთ მხოლოდ ფოტოკორესპოდენტებს, ტელეოპერატორებს და ბურთის მომწოდებელ პირებს.

8.9. დელეგატი და მსაჯი უფლებამოსილნი არიან მატჩის დაწყებამდე 10 წუთით ადრე ჩაატარონ თათბირი, რომელშიც მონაწილეობას მიიღებენ ორივე გუნდის წარმომადგენლები.

8.10. მატჩის დაწყებისა და დამთავრების შემდეგ მოთამაშეები ვალდებულნი არიან, ხელი ჩამოართვან ერთმანეთსა და მსაჯებს და დაემშვიდობონ მაყურებელს.

8.11. თუ გუნდი მოიხსნება ჩემპიონატის ლიგის პირველი ეტაპის დასრულებამდე, მის მიერ ჩატარებელი ყველა იმ შეხვედრის შედეგი, რომელშიც ეს გუნდი არ დამარცხებულა ხუთზე მეტი ბურთის სხვაობით, ჩაეთვლება წაგება 0-5, ხოლო, ხუთზე მეტი ბურთის სხვაობით დამარცხების შემთხვევაში, ასეთი მატჩის შედეგი რჩება უცვლელი. ყველა დარჩენილი შეხვედრა ჩაეთვლება წაგება 0-5.

8.12. თუ გუნდი მოიხსნება მეორე წრის ან/და ფლეიოფის მიმდინარეობისას, მის მიერ ჩასატარებელი ყველა დარჩენილი შეხვედრა ჩაეთვლება წაგება 0-5, ხოლო ჩატარებული მატჩების შედეგები რჩება უცვლელი.

8.13. ტექნიკური მოგების შემთხვევაში, ჩემპიონატის სატურნირო ცხრილის გატანილი გოლების მაჩვენებელში გუნდს ემატება 5 გოლი.

8.14. ჩემპიონატის მსვლელობისას, მოთამაშე 3 (სამი) ყვითელი ბარათის სხვადასხვა მატჩში მიღების შემთხვევაში გამოტოვებს 1 მატჩს, ერთ მატჩში მიღებული ორი ყვითელი ბარათის შემდეგ წითელი ბარათის მიღების შემთხვევაში ან პირდაპირ წითელი ბარათის მიღების შემთხვევაში - მოთამაშე გამოტოვებს 2 მატჩს და განსაკუთრებულ შემთხვევაში სადისციპლინო კომიტეტი იმსჯელებს და დაადგენს დისკვალიფიკაციის სახესა და ვადას. იმ შემთხვევაში, თუ დარღვევა შეიცავს სისხლის ან ადმინისტრაციული სამართალდარღვევის ნიშნებს, საქმე გადაეცემა შესაბამის ორგანოებს.

8.14.1 ჩემპიონატის მატჩების მსვლელობისას ნებისმიერი ფეხებში ვარდნა, რომელიც განხორციელდა ბირთის მქონე მოთამაშის ფეხთან 1 მეტრის რადიუსში იქნება ეს ბურთზე თამაში თუ არა ისჯება ყვითელი ბარათით.

8.15. დისკვალიფიკაციის ვადის შემცირება დაუშვებელია, გარდა იმ შემთხვევისა თუ დისკვალიფიკაცია გამოწვეულია მსაჯის არასწორი გადაწყვეტილებით, რასთან დაკავშირებითაც გადაწყვეტილებას იღებს სადისციპლინო კომიტეტი.

8.16. მოედნიდან გაძევებულ მოთამაშეს, მწვრთნელს და გუნდის წარმომადგენელს სათადარიგოებს შორის ყოფნა ეკრძალება და უნდა გადაინაცვლოს ტრიბუნაზე.

8.17. ჩემპიონატის მატჩის თითოეული ტაიმი გრძელდება 20 (ოცი) წუთი “ჭუჭყიანი” დრო, ტაიმებს შორის შესვენება გრძელდება 10 (ათი) წუთი. ტაიმის სათამაშო დროის 20 წუთის ამოწურვის შემთხვევაში, თამაში გრძელდება მანამ სანამ ბურთი მოედანზეა და არ გადაკვეთს მოედნის ხაზს.

8.18. ჩემპიონატებზე რომლებიც იმართება ფლეიოფის სისტემით, მატჩის ძირითადი დროის ფრედ დასრულების შემთხვევაში, გამარჯვებულის გამოსავლენად დაინიშნება ბულიტების სერია.

8.18.1 ბულიტი - როდესაც მოთამაშე მოედნის ცენტრიდან უტევს კარს გოლის გასატანად, ბულიტის შესრულების მომენტში მეკარეს შეუძლია თავისუფლად გადაადგილდეს საჯარიმოში და არ აქვს უფლება დატოვოს საჯარიმოს ტერიტორია. მეკარის მიერ საჯარიმოს ტერიტორიის გარეთ გამოსვლის შემთხვევაში ბულიტი ჩაითვლება რეალიზებულად.

8.18.2. ბულიტების სერიაში თითოეული გუნდიდან მონაწილეობს მათ მიერ შერჩეული სამ-სამი მოთამაშე. მოთამაშე ბულიტის შესასრულებლად ეძლევა 10 წამი რომლის დროსაც ბურთი უნდა იყოს მოედნის ფარგლებში, ხოლო იმ შემთხვევაში თუ მოწინააღმდეგე გუნდის მეკარემ ბურთი მოიგერია მოედნის ფარგლებს გარეთ ან/და ბურთი დააფიქსირა ხელებში ასეთ შემთხვევაში ბულიტი ითვლება მოგერიებულად.

8.19. მატჩის დაწყების დრო შეიძლება შეიცვალოს მხოლოდ იმ შემთხვევაში, თუ მატჩის დაწყება ჭიანურდება სტადიონის ტექნიკური გაუმართავობის ან შფა-სგან დამოუკიდებელი სხვა ობიექტური მიზეზების გამო.

8.20. ჩემპიონატის მატჩების მსვლელობის დროს გუნდებს უფლება აქვთ გამოიყენონ 1 წუთშესვენება თითოეულ ტაიმში.

8.20.1 წუთშესვენების გამოყენების მსურველი გუნდის მწრთვნელი ან/და გუნდის წარმომადგენელი ვალდებულია გადასცეს მატჩის დელეგატს შესაბამისი ბარათი. წუთშესვენების გამოყენების უფლება მსურველ გუნდს წარმოეშობა იმ მომენტიდან, როდესაც ბურთი გადასულია მოედნის ფარგლებს გარეთ და ბურთის თამაშში შეყვანის უფლება ეკუთვნის იმ გუნდს, რომელიც ითხოვს წუთშესვენებას.

8.20.2 პირველ ტაიმში გამოუყენებელი წუთშესვენება გუნდს არ გადაყვება მეორე ტაიმში, მათ შორის ისეთ შემთხვევებში, როდესაც გუნდს მოთხოვნილი ჰქონდა წუთშესვენება პირველ ტაიმში და ტაიმი ისე დასრულდა, რომ გუნდმა ვერ მოიპოვა ბურთის თამაშში შეყვანის უფლება.

8.21. ჩემპიონატის მატჩები ჩატარდება შფა-ს მიერ შერჩეული საფეხბურთო ბურთებით. საფეხბურთო ბურთი უნდა იყოს “5 ზომა“ და უნდა ჰქონდეს შემდეგი წარწერებიდან ერთ- ერთი:

• FIFA APPROVED ან/და FIFA QUALITY PRO

• FIFA INSPECTED და/ან FIFA QUALITY

• INTERNATIONAL MATCHBALL STANDARD

8.22 ჩემპიონატის ჩატარება კონკრეტულ მოედანზე შესაძლებელია, თუ იგი აკმაყოფილებს შესაბამის სტანდარტს.

მოედნის სიგანე - მინიმალური 28 მეტრი , მაქსიმალური 36 მეტრი.

მოედნის სიგრძე - მინიმალური 48 მეტრი, მაქსიმალური 60 მეტრი.

საჯარიმოს სიგანე - მინიმალური 14 მეტრი, მაქსიმალური 16 მეტრი

საჯარიმოს სიგრძე - მინიმალური 8 მეტრი, მაქსიმალური 10 მეტრი

პენალტის ნიშნული - 7 მეტრი კარიდან

კარების სიგანე - მინიმალური 4.6 მეტრი, მაქსიმალური 5.2 მეტრი

კარების სიმაღლე - მინიმალური 2 მეტრი, მაქსიმალური 2.15 მეტრი

8.23. ჩემპიონატის მატჩები ჩატარდება ამ დებულებით განსაზღვრული სპეციალური წესებისა და IFAB-ის მიერ დადგენილი წესების შესაბამისად. ნორმათა კოლიზიის შემთხვევაში უპირატესად მოქმედებს ამ დებულებით განსაზღვრული სპეციალური წესები.

8.24. ლიგის ფორმატით გამართულ ჩემპიონატებში თანაბარი ქულების დაგროვების შემთხვევაში, გუნდებს უპირატესობა მიენიჭებათ შემდეგი პრიორიტეტების რიგითობის მიხედვით:

1) უშუალოდ ურთიერთშეხვედრის შედეგი;

2) გატანილი და მიღებული ბურთების უკეთესი სხვაობა;

3) მოგებათა მეტი რაოდენობა;

4) გატანილი გოლების მეტი რაოდენობა;

5) გაშვებული გოლების ნაკლები რაოდენობა

თუ გუნდების ეს მაჩვენებელიც თანაბარი აღმოჩნდება, ჩატარდება გადათამაშება ერთი მატჩით. გადათამაშების ფრედ დასრულების შემთხვევაში, დაინიშნება ბულიტების სერია.

8.25 ჩემპიონატის ყველა მატჩი გაიმართება შემდეგი სპეციალური წესების დაცვით:

- დაუშვებელია მინდორზე მოთამაშე ფეხბურთელის მიერ საკუთარი მეკარისათვის ფეხით დაგორებული ბურთის ხელში აღება.

- მეკარეს თამაშში ბურთი შეყავს ხელის გამოყენებით, იმ შემთხვევაში თუ მეკარემ მინდორზე დადო, ბურთი ითვლება თამაშში სეყვანილად და ასეთ შემთხვევაში გატალი გოლი ჩაითვლება წესების დაცვით რეალიზებულად.

- კუთხური დარტყმა ინიშნება, როდესაც ბურთი მთლიანად გადაკვეთს კარის ხაზს მიწაზე ან ჰაერში, იმ პირობით, რომ მას ბოლოს შეეხო დამცველი გუნდის მოთამაშე და გოლი არ არის გატანილი. კუთხურის მოწოდების დროს დამცველი გუნდის ფეხბურთელი არ შეიძლება იყოს ბურთთან 5 მეტრზე ახლოს.

- თუ სათამაშო ბურთი გადაკვეთს მოედნის გვერდით ხაზს, ამ შემთხვევაში ინიშნება აუტი, რომლის შემთხვევაშიც ბურთს თამაშში შეიყვანს მეტოქე გუნდის ფეხბურთელი. აუტიდან ბურთი თამაში შეყვანილი უნდა იქნეს მხოლოდ ფეხის გამოყენებით, აუტიდან პირდაპირ გატანილი გოლი გაუქმდება თუ მას არ შეეხო ბურთის მომწოდებლის გარდა სხვა ფეხბურთელი. აუტის მოწოდების დროს დამცველი გუნდის ფეხბურთელი არ შეიძლება იყოს ბურთთან 5 მეტრზე ახლოს.

- რომელიმე გუნდის კარის მიმართულებით დანიშნული საჯარიმო ან თავისუფალი დარტყმის შემთხვევაში, დამცველი გუნდის ფეხბურთელი უნდა იმყოფებოდეს არა ნაკლებ 5 მეტრის მანძილზე ბურთიდან, გარდა იმ შემთხვევისა, როდესაც ისინი იმყოფებიან საკუთარი კარის ხაზზე ბოძებს შორის.

- საჯარიმო მოედნის შიგნით სათამაშო წესების დარღვევის შემთხვევაში დაინიშნება 7 მეტრიანი საჯარიმო დარყმა შემტევი გუნდის სასარგებლოდ.

- მოთამაშის შეცვლა შესაძლებელია მატჩის მსვლელობის პარალელურად მატჩის დელეგატის ზედამხედველობით და მითითების შესაბამისად. ფეხბურთელი არ შეიძლება შევიდეს მოედანზე მანამ სანამ მოედნის მოთამაშე არ დატოვებს სათამაშო მოედნის ფარგლებს.

- ტაიმის სათამაშო დროის ამოწურვის შემთხვევაში ტაიმი არ მთავრდება მანამ, სანამ ბურთი არ გადაკვეთს რომელიმე მოედნის ხაზს.

- მატჩის მსვლელობის დროს წითელი ბარათის მიღების შემთხვევაში მოთამაშე გაძევებული იქნება მოედნიდან 5 წუთის განმავლობაში, გაძევებული მოთამაშის უკან დაბრუნება დაუშვებელია. 5 წუთის გასვლის შემდგომ სანქცირებულ გუნდს შეუძლია შემოიყვანოს მოედანზე სხვა ფეხბურთელი. იმ შემთხვევაში თუ გუნდის მატჩის განაცხადში იმყოფებოდა სულ 7 ფეხბურთელი, გუნდი დარჩენილ დროს გაატარებს კაცნაკლული.

8.26 თითოეულ ჩემპიონატის მატჩზე გუნდი წარმოდგენილი უნდა იყოს

მენეჯერით/მწრთვნელით, იმ შემთხვევაში თუ გუნდის განაცხადში აღნიშნულ პოზიციაზე მითითებული პირი არ იმყოფება მატჩის დროს მოედანზე, მაშინ მისი დროებით ჩანაცვლება ხდება მატჩის განაცხადში მყოფი ფეხბურთელით, ასეთ დროს აღნიშნული ფეხბურთელი ითავსებს მენეჯერის/მწრთვნელის ფუნქციას დროებით და არ აქვს მატჩში მონაწილეობის მიღების უფლება, როგორც ფეხბურთელს.

8.27 ჩემპიონატის მონაწილე ყველა გუნდი ვალდებულია დაემორჩილოს ორგანიზატორებისა და მატჩის დელეგატების მითითებებს, დაუმორჩილებლობის შემთხვევაში შფა უფლებამოსილია გააუქმოს მატჩის შედეგი, ფეხბურთელს აუკრძალოს კონკრეტულ შეხვედრაში მონაწილეობის უფლება და დაუმორჩილებელ გუნდს ჩაუთვალოს ტექნიკური მარცხი ან/და მოხსნას გათამაშებიდან.

9. მსაჯობა

9.1. მატჩებს მოემსახურებიან შფა-ის მიერ რეკომენდირებული და დამტკიცებული მსაჯები. მსაჯობა ხორციელდება „FIFA“-ს წესების შესაბამისად და ამავე დებულების გათვალისწინებით.

9.2. მატჩზე მთავარი მსაჯის გამოუცხადებლობის ან მის მიერ მატჩის გაგრძელების შეუძლებლობის შემთხვევაში მის ფუნქციებს ასრულებს მეორე სათადარიგო მსაჯი.

9.3. მსაჯი ვალდებულია წერილობით აღნიშნოს მოთამაშეთა გაფრთხილების და მინდვრიდან გაძევების შემთხვევები დროის მითითებით. მატჩის დროს მომხდარი საგანგებო შემთხვევის შესახებ მსაჯმა იმავე დღეს ადგილზე უნდა აცნობოს მატჩის დელეგატს.

9.4. მატჩებზე მსაჯის მომსახურების თანხას და ხარჯებს ანაზღაურებს შფა.

10. მატჩის დელეგატი/კოორდინატორი

10.1. ჩემპიონატის მატჩების უკეთ ორგანიზებისა და მატჩის მონაწილეთა უსაფრთხოების დაცვის მიზნით, ჩემპიონატის მატჩებზე ინიშნება დელეგატი. დელეგატებს ნიშნავს შფა-ს საშეჯიბრო განყოფილება.

10.2. მატჩის დელეგატი პასუხისმგებელია მატჩის ორგანიზებასთან დაკავშირებული საკითხების კონტროლზე. იგი უსაფრთხოების საკითხებზე თანამშრომლობს საზოგადოებრივი წესრიგის დაცვის წარმომადგენლებთან, სტადიონის დირექტორთან ან სტადიონის პასუხისმგებელ პირთან. დელეგატი ვალდებულია აქტიური მონაწილეობა მიიღოს და გადაწყვიტოს მატჩის ჩატარებასთან დაკავშირებული ყველა საკითხი და ნებართვა გასცეს მატჩის ჩატარების შესახებ. დელეგატი ვალდებულია შეადგინოს ტექნიკური ოქმი, სადაც მითითებული იქნება მოთამაშეთა გაფრთხილების და მინდვრიდან გაძევების შემთხვევები, გატანილი გოლები, განხორციელებული ცვლილებები დროის მითითებით, მატჩის დროს მომხდარი საგანგებო შემთხვევები. ექსტრემალური სიტუაციის გამო მატჩის დაწყების ან დაწყებული მატჩის შეწყვეტის საკითხს წყვეტს მატჩის დელეგატი.

10.3. მატჩის დელეგატს მომსახურების თანხას უხდის შფა.

10.4. თითოეული მატჩის დასრულების შემდეგ, მატჩის დელეგატი ავსებს და ხელს აწერს მატჩის ოქმს.

11. სამედიცინო და უსაფრთხოების საკითხები

11.1. სასურველია თბილისის ჩემპიონატებში მონაწილე თითოეულ გუნდს ჰყავდეს ექიმი. ექიმის არ არსებობის შემთხვევაში დაზიანებულ მოთამაშეს პირველად დახმარებას აღმოუჩენს შფა-ს მიერ დაქირავებული კვალიფიციური ექიმი, ამასთან საჭიროების შემთხვევაში მატჩის დელეგატი/კოორდინატორი გამოიძახებს სასწრაფო სამედიცინო დახმარებას.

11.2. გუნდის წარმომადგენელი ვალდებულია გუნდის განაცხადში შეიყვანოს მოთამაშე, რომელსაც აქვს ჩემპიონატში მონაწილეობისთვის შესაბამისი ჯანმრთელობის მდგომარეობა და ფიზიკური მომზადება. ფეხბურთელების ჯანმრთელობის მდგომარეობაზე პასუხისმგებელია გუნდის ოფიციალური წარმომადგენელი.

11.3. თითოეული გუნდი და გუნდის გულშემატკივარი ვალდებულია მატჩის მსვლელობისას დაიცვას უსაფრთხოების წესები. არ ჩაერთოს და არ შეუწყოს ხელი არეულობასა და კონფლიქტს. წინააღმდეგ შემთხვევაში, დამრღვევი პირის ან/და გუნდის პასუხისმგებლობას განსაზღვრავს შფა-ს სადისციპლინო კომიტეტი სადისციპლინო კოდექსის შესაბამისად. იმ შემთხვევაში, თუ დარღვევა შეიცავს სისხლის ან ადმინისტრაციული სამართალდარღვევის ნიშნებს, საქმე გადაეცემა შესაბამის ორგანოებს.

11.4. მატჩების მიმდინარეობისას უსაფრთხოებას უზრუნველყოფს შფა. საჭიროების შემთხვევაში გამოძახებული იქნება საპატრულო პოლიცია.

12. დაჯილდოება

12.1. საპრიზო ფონდი

თბილისის ჩემპიონატის გამარჯვებული გუნდები მიიღებენ შემდეგი სახის პრიზებს

• თბილისის betlive Master League I ადგილი -10000 - ლარი, რომელშიც შედის მოგების გადასახადი ( დამატებით გარდამავალი თასი და მედლები)

• თბილისის betlive Master League II ადგილი - 6000 - ლარი, რომელშიც შედის მოგების გადასახადი ( დამატებით მედლები)

• თბილისის betlive Master League 2 -ის I ადგილი - 5000 - ლარი, რომელშიც შედის მოგების გადასახადი (დამატებით გარდამავალი თასი და მედლები)

• თბილისის betlive Master League 3 -ის გამარჯვებული - 5000 - ლარი, რომელშიც შედის მოგების გადასახადი (დამატებით გარდამავალი თასი და მედლები)

• თბილისის მერიის თასის I ადგილი - 6000 -ლარი, რომელშიც შედის მოგების გადასახადი (დამატებით გარდამავალი თასი და მედლები)

• თბილისის მერიის თასის II ადგილი - 3000-ლარი, რომელშიც შედის მოგების გადასახადი (დამატებით მედლები)

• თბილისის MASTER LEAGUE 3 -ის მე-2 ადგილი (მედლები)

12.2 დასავლეთ და აღმოსავლეთ betlive Master League-ის გამარჯვებული გუნდები მიიღებენ ფულად ჯილდოს 4000 ლარის ოდენობით, მოგების გადასახადის ჩათვლით, ხოლო მე-2 ადგილზე გასული გუნდები 2000 ლარის ოდენობით, მოგების გადასახადის ჩათვლით.

12.3. საქართველოს MASTER CUP გამარჯვებული გუნდები მიიღებენ შემდეგი სახის პრიზებს

• საქართველოს MASTER CUP I ადგილი 7000- ლარი;

• საქართველოს MASTER CUP II ადგილი - 3500- ლარი;

12.4. ჩემპიონატების დასრულების შემდეგ, გამოვლინდება საუკეთესო მწვრთნელი/მენეჯერი, ფეხბურთელი, მეკარე, მცველი, საუკეთესო უნივერსალი, ბომბარდირი, საუკეთესო ნახევარმცველი და საუკეთესო თავდამსხმელი რომლებსაც გადაეცემათ ინდივიდუალური პრიზები, ამასთან გამოვლინდებიან საუკეთესო მსაჯები, რომლებიც მიიღებენ შესაბამის ინდივიდუალურ პრიზს.

13. გაუთვალისწინებელი შემთხვევები

გაუთვალისწინებელი შემთხვევების დროს შფა-ს უფლება აქვს მიიღოს შესაბამისი გადაწყვეტილება, გონივრული დასაბუთების საფუძველზე.

14. დასკვნითი დებულება

14.1 თითოეული გუნდი, წარმომადგენლის მიერ ამ დებულების გაცნობით ცნობს და ემორჩილება დებულების ნორმებს, იღებს პასუხისმგებლობას მათ შესრულებაზე და შეუსრულებლობის შემთხვევაში ემორჩილება შფა-ს მიერ დადგენილ სანქციებს.

14.2 შფა ემიჯნება ნებისმიერი სახის დისკრიმინაციას. პროექტის ფარგლებში გამართულ ნებისმიერ მატჩში დაფიქსირებული დისკრიმინაციის შემთხვევაში, მოთამაშე დაისჯება ჩემპიონატიდან მოკვეთით, ხოლო გუნდი, ქულების დაკლებით. შესაბამის გადაწყვეტილებას მიიღებს სადისციპლინო კომიტეტი. დისკრიმინირებულ პირს შეუძლია გამოიყენოს შესაბამისი საჯარო სამართლებრივი ბერკეტები.

ააიპ 7x7 ფეხბურთის ასოციაციის პრეზიდენტი

აკაკი ხლაბუსტოვი